Ágústspá Siggu Kling - Hrúturinn: Þetta hefur verið margslungið sumar

Elsku Hrúturinn minn, þú hefur þann eiginleika að sigrast á því sem þú tekur þér fyrir hendur, en þú átt það til að berjast fyrir aðra sem eiga það ekki skilið að þú berir þeirra bagga. Þegar þú lítur yfir lífið þá geturðu séð þú ert búinn að heyja ótrúlegustu orrustur og allar hafa þær sem hafa látið þér líða svo illa hafa gert þig að miklu merkilegri og sterkari manneskju en þig grunar.

Þetta hefur verið margslungið sumar og ýmsar aðstæður hafa hvekkt þig, en þetta gerir þig einungis sterkari, vitrari og máttugri. Þú mætir af alefli inn í þetta nýja og skarpa tímabil sem er að hefjast og lætur ekki neina truflun setja strik í reikninginn, hugsun þín verður skýrari og sterkari með hverjum andardrætti sem þú dregur.

Þú skalt sækjast eftir betri stöðu en þú hefur núna í lífinu, gera meiri kröfur og þú stendur svo sannarlega undir þeim. Þú verður eins og sporhundur sem finnur það svo bókstaflega á lyktinni hvað er að fara að gerast eða hvaða skref eru næst og þá eflist þitt næma innsæi, svo enginn getur komist upp með svik og plott án þess þú skynjir það.

Þú hefur átt það til að fara á undan sjálfum þér, en þá ertu ekki í tengingu við þetta magnaða innsæi sem þú býrð yfir og verður þá eins og batteríslaus sími sem svo sannarlega nær ekki sambandi við neinn. Þið eruð svo mörg í þessu merki sem hleypið ekki öðrum að tilfinningahlaðborði ykkar og óafvitandi getið verið of stíf, gefið ekki eftir þó ykkur langi til.

Þú átt eftir að tengja þig beint við rafmagn og vera alveg fullhlaðinn af því sem þig vantar þegar september hefst. Ef þú ert á lausu elskan mín og ert tilbúinn að faðma ástina, þá getur hún verið á ólíklegum stað og kannski ekki akkúrat sú týpa sem þú sást fyrir þér, en það gerir söguna þína svo miklu óvæntari og skemmtilegri.

Knús og kossar, Sigga Kling

Hrútur 22. mars - 19. apríl

Hera Björk Þórhallsdóttir söngkona, 29. mars 

Björgvin Halldórsson söngvari, 16. apríl 

Kári Stefánsson vísindamaður, 6. apríl 

Vigdís Finnbogadóttir, fyrrverandi forseti, 15. apríl 

Anna Svava Knútsdóttir leikkona, 31. mars 

Elton John söngvari, 25. mars 

Salka Sól , 18. apríl 

Berglind Pétursdóttir festival, 2. apríl 

Bríet Ísis, tónlistarkona, 22. mars 

Lady Gaga, söng- og leikkona, 28. mars 

Aretha Franklin, söngkona, 25. mars 

Victoria Beckham, kryddpía, 17. apríl 

Leonardo da Vinci, listamaður, 15. apríl