Erlent

At­vinnu­mála­ráð­herrann Acosta segir af sér í tengslum við Ep­stein-málið

Andri Eysteinsson skrifar
Donald Trump tilkynnti afsögn Acosta áður en hann hélt í opinbera heimsókn til Wisconsin og Ohio.
Donald Trump tilkynnti afsögn Acosta áður en hann hélt í opinbera heimsókn til Wisconsin og Ohio. AP/Andrew Harnik
Atvinnumálaráðherra Bandaríkjanna, Repúblikaninn Alexander Acosta, hefur ákveðið að segja af sér embætti í kjölfar mikillar gagnrýni á fyrri störf hans sem blossað hafa upp að nýju eftir að mál milljarðamæringsins Jeffrey Epstein komst í hámæli. AP greinir frá.

Epstein, sem sakaður er um að hafa beitt mikinn fjölda stúlkna undir lögaldri kynferðisofbeldi og greitt þeim fyrir að finna ný fórnarlömb, slapp frá lengri fangelsisvist vegna samskonar mála árið 2008 þegar hann samdi við yfirvöld árið 2008.

Epstein samdi við saksóknarann í Miami í Flórída um að alríkisákærur yrði felldar niður en í stað þess skyldi Epstein gangast við ríkisákærum og verja 13 mánuðum í fangelsi. Saksóknarinn sem sá um samninginn var Alexander Acosta.

Samdi án þess að láta fórnarlömb Epstein vita

Bandaríkjaforseti, Donald Trump, greindi frá þessu fyrir utan Hvíta húsið í Washington í dag, með Acosta sér við hlið. Trump sagði eftirsjá af Acosta sem hafi verið afbragðs atvinnumálaráðherra. Þá tók Trump það fram að hann hafi ekki beðið Acosta um að stíga til hliðar. Acosta sagði að það væri ekki rétt að láta málaflokkinn líða fyrir þá gagnrýni sem hann hlyti. Frekar skyldi hann stíga til hliðar en ekki geta sinnt starfi sínu að fullu.

Afsögnin fer formlega í gegn að sjö dögum liðnum.

Frá því að umræðan um samning Acosta og Epstein árið 2008 blossaði upp að nýju hafa þingmenn úr röðum Demókrataflokksins sí og æ kallað eftir afsögn ráðherrans. Sögðu þingmenn samninginn hafa verið ólöglegan vegna formgalla en Acosta mun ekki hafa látið fórnarlömb Epstein vita af samningnum þegar hann var gerður.

Trump og Acosta höfðu báðir á undanförnum dögum varið Atvinnumálaráðherrann og hvatti forsetinn Acosta til þess að útskýra gjörðir sínar á blaðamannafundi sem hann og gerði. Þar sagði Acosta að hann og starfsfólk hans hafi gert það rétta í stöðunni og hafi gert það sem þurfti til þess að koma Epstein á bak við lás og slá.

Spurður hvort hann sæi eftir atburðunum 2008 sagði Acosta: „Það eru tólf ár liðin og margt búið að gerast, heimurinn í dag er gjörólíkur þeim árið 2008.“

Ánægður með að Epstein fari aftur á bak við lás og slá

Þegar ákærur á hendur Epstein voru birtar af saksóknurum í New York í vikunni sagðist Acosta vera ánægður með ákvörðun saksóknara. Á Twitter síðu sinni sagði Acosta að glæpir Epstein væru hræðilegir.

„Með þeim sönnunargögnum sem ákæruvaldið hafði undir höndum fyrir áratug síðan, kröfðust saksóknarar að Epstein yrði sendur bak við lás og slá, gert að skrá sig sem kynferðisbrotamann og heimurinn skyldi vita af því,“ skrifaði Acosta.



„Nú þegar ný sönnunargögn og vitnisburðir hafa komið fram í málinu hefur ákæruvaldið í New York enn betra tækifæri til þess að láta réttlætið sigra,“ skrifaði Acosta einnig.

Alexander Acosta tók við atvinnumálaráðherrastólnum snemma árs 2017, áður en að því kom hafði hann eins og áður sagði verði saksóknari í Miami og hafði verið deildarforseti lagadeildar Florida International háskólans.


Tengdar fréttir




Fleiri fréttir

Sjá meira


×