Erlent

Lögregla birtir myndband af Smollett með snöruna um hálsinn

Kristín Ólafsdóttir skrifar
Andlit Smolletts er útmáð í myndbandinu sem lögregla birti en hann sést hér með hina meintu snöru utan um hálsinn þegar hann tekur á móti lögreglumönnum í íbúð sinni.
Andlit Smolletts er útmáð í myndbandinu sem lögregla birti en hann sést hér með hina meintu snöru utan um hálsinn þegar hann tekur á móti lögreglumönnum í íbúð sinni. Skjáskot/Lögreglan í Chicago

Lögregla í Chicago í Bandaríkjunum birti í gær myndband af leikaranum Jussie Smollett sem tekið er nokkrum klukkustundum eftir að meint árás, sem Smollett heldur því fram að hann hafi orðið fyrir, átti sér stað. Smollett sést þar taka á móti lögreglumönnum með snöru um hálsinn, sem hann segir að árásarmennirnir hafi vafið um háls sér. Smollett er sakaður um að hafa sviðsett árásina sjálfur.

Fjöldi óvæntra vendinga hefur orðið á málinu síðan Smollett, sem þekktastur er fyrir leik sinn í sjónvarpsþáttunum Empire, steig fram í janúar og sagði árásarmenn hafa kýlt sig í andlitið, hellt yfir sig „óþekktu efni“ og vafið snöru um háls sér. Smollett sagði árásina hafa verið framda á grundvelli fordóma í garð svartra og samkynhneigðra en hann tilheyrir báðum hópum.

Sjá einnig: Niðurbrotinn eftir að hafa verið sakaður um að greiða mönnum fyrir að sviðsetja árás á sig

Smollett var síðar ákærður og handtekinn fyrir að ljúga til um árásina, sem hann var sakaður um að hafa sviðsett vegna óánægju með laun fyrir störf sín við Empire-þættina. Að endingu var fallið frá öllum ákærum á hendur Smollett en hann greiddi sekt og sinnti samfélagsþjónustu í staðinn. Smollett var samt sem áður rekinn úr leikaraliði þáttanna og klipptur út úr lokaþáttum nýjustu þáttaraðarinnar.

Jussie Smollett var sakaður um að hafa fengið bræðurna Abel og Ola Osundairo til að sviðsetja árásina með sér. AP/Ashlee Rezin

Í myndbandi sem lögregla birti svo í gær sjást tveir lögreglumenn svara útkalli að íbúð Smollett í Chicago á níunda tímanum janúarmorguninn eftir árásina, eða um sjö klukkustundum eftir að Smollett segir að ráðist hafi verið á sig.

Þar hitta lögreglumennirnir fyrir Smollett og Frank Gatson, sem kynnir sig sem „listrænan stjórnanda“ Smolletts. Gatson segir Smollett stórstjörnu sem vilji líklega ekki gera veður úr málinu en bætir við að hann sé í uppnámi þar sem árásarmennirnir hafi sett snöru um háls hans.

Smollett tekur á móti lögreglumönnunum með hvítt reipi, snöruna, um hálsinn. Hann kveðst aðspurður ætla að taka snöruna af sér og gerir það örskotsstund síðar. „Ég vildi bara að þið sæjuð hana,“ segir Smollett við lögreglumennina. Þá tjáir hann lögreglumönnunum að árásarmennirnir hafa hellt yfir sig klór. Myndbandið má sjá í spilaranum hér að neðan.

Myndbandið er hluti af stórum gagnapakka málsins sem lögregla gerði aðgengilegan almenningi í gær. Í öðru myndbandi sjást Abel og Ola Osundairo, bræður sem sakaðir eru um að hafa hjálpað Smollett að sviðsetja árásina, í leigubíl kvöldið sem hin meinta árás var gerð.

Osundairo-bræðurnir stefndu lögmannateymi Smolletts í apríl fyrir meiðyrði í kjölfar umfjöllunar af meintri aðkomu þeirra að árásinni en lögmennirnir sögðu kröfu bræðranna „hlægilega“.



Í lok mars var Smollett gert að greiða 130 þúsund Bandaríkadali, rúmar sextán milljónir íslenskra króna, fyrir kostnað lögregluembættisins við rannsókn málsins. Smollett neitaði að borga en var í kjölfarið stefnt af borgaryfirvöldum í Chicago fyrir þrefalt hærri upphæð en honum var upphaflega gert að reiða fram.

Þann 21. júní síðastliðinn skipaði dómari í Chicago sérstakan saksóknara til að rannsaka meðhöndlun lögreglu á fullyrðingum Smolletts. Í frétt BBC er haft eftir talsmanni lögreglu að rannsóknin gæti orðið til þess að Smollett verði ákærður í annað sinn.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.