Íslenski boltinn

„Ekki viss um að ég myndi kvitta upp á það að FH sé með besta mannskapinn“

Anton Ingi Leifsson skrifar

Atli Viðar Björnsson, einn sérfræðingur Pepsi Max-markanna, segir að bikarkeppnin sé besti möguleiki FH á að vinna bikar í sumar.

FH-liðið hefur ekki farið vel af stað í Pepsi Max-deild karla og er í sjöunda sæti deildarinnar. Liðið er þó enn í bikarnum.

Annað kvöld mætir liðið Grindavík í átta liða úrslitum bikarsins og segir Atli Viðar að það sé lífæð FH í sumar, sjálfur Mjólkurbikarinn.

„Þetta er lífæð fyrir þá að taka titil. Ég held að menn horfi til þess í Kaplakrika að það er stutt leið til þess að verða bikarmeistari,“ sagði Atli Viðar í samtali við Guðjón Guðmundsson í Sportpakka kvöldsins.

„Íslandsmeistaratitillinn er orðinn fjarlægur draumur þetta árið svo ég held að þeir líti á þetta sem stóra sénsinn að vera í baráttu um bikar þetta árið.“

„Þeir hafa verið að ströggla í síðustu leikjum. Það hefur vantað upp á leikgleði og stemningu og ég held að ef menn grafa aðeins eftir því aftur þá er auðvelt að koma sér á lappirnar og sækja úrslit.“

Steven Lennon, framherji FH, sagði í viðtali eftir leik fyrr í sumar að FH væri með besta mannskap Pepsi Max-deildarinnar en Atli, fyrrum samherji Lennon, er ekki sammála þeirri fullyrðingu.

„Taflan sýnir að svo er ekki. Ég er ekki viss um að ég myndi kvitta upp á það að FH sé með besta mannskapinn. Þeir eru með gott lið og góðan hóp og eiga sannarlega að vera búnir að skila fleiri stigum í deildinni.“

„Nú er nýtt mót og pínulítið eitthvað sem þeir hafa verið að bíða eftir. Ég held að það verði mikill þungi og pressa á þeim í þessum leik á morgun.“

Innslagið í heild sinni má sjá í sjónvarpsglugganum hér að ofan.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.