Innlent

Sendi nektar­myndir af barns­móður sinni á yfir 200 net­föng

Sunna Karen Sigurþórsdóttir skrifar
Úr húsnæði Landsréttar í Kópavogi.
Úr húsnæði Landsréttar í Kópavogi.

Lands­réttur staðfesti í gær að karl­maður sem grunaður er um að hafa beitt barns­móður sína kyn­ferðis­legu of­beldi, meðal annars með dreifingu nektar­mynda af henni, skuli sæta tveggja vikna gæslu­varð­haldi.

Maðurinn er grunaður um að hafa sent myndirnar á 235 net­föng og að hafa birt þær á sam­fé­lags­miðlum. Myndirnar á hann meðal annars að hafa sent til fjöl­skyldu konunnar, vina hennar, for­eldra barna í bekk sonar þeirra og fleiri.

Fram kemur í úr­skurðinum að rann­sókn málsins hafi hafist í febrúar þegar konan lagði fram kæru á hendur manninum. Hún lýsti því í skýrslu­tökum að síðast­liðin fjögur ár hefði maðurinn beitt hana miklu and­legu of­beldi, og sagði hann hafa tryllst þegar hún vísaði honum út af heimili sínu. Í kjöl­farið hefði hann byrjað að dreifa um tuttugu nektar­myndum af henni, sparkað í síðu hennar, hellt yfir hana mjólk og slegið son þeirra kinn­hest.

Rann­sókn lög­reglu leiddi í ljós að í febrúar og mars hafi 121 tölvu­póstur verið sendur á 235 mis­munandi net­föng, en talið er að fleiri en einn við­takandi geti verið að baki nokkrum þeirra póst­fanga. Af­rit af meiri­hluta tölvu­póstanna var sent konunni.

Maðurinn hefur neitað að tjá sig við lög­reglu, að öðru leyti en því að hann kannist ekki við net­föngin sem tölvu­póstarnir voru sendir úr. Héraðs­dómur féllst á að rök­studdur grunur væri um að hann hefði gerst sekur um brotin, og taldi ekki úti­lokað að hann gæti tor­veldað rann­sókn málsins, svo sem með því að eyða raf­rænum sönnunar­gögnum, gangi hann laus.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.