Fundu lík heima hjá konu sem var skotin með lásboga

Lögreglan í Þýskalandi fann lík tveggja kvenna í íbúð konu sem var skotin til bana með lásboga ásamt tveimur öðrum í Bæjaralandi um helgina. Málið þykir það dularfyllsta en lögregla reynir nú að varpa ljósi á tengsl tveggja kvenna og eldri karlmanns sem voru skotin með lásboga.

Lík hinna kvennanna tveggja fundust í íbúð í Wittingen í norðanverðu Þýskaland, hundruð kílómetra frá hótelinu við Ilz-ána nærri Passau í Bæjaralandi þar sem konan sem bjó í íbúðinni fannst látin á laugardag. Lögreglan hefur ekki greint frá tengslum kvennanna þriggja eða hvernig dauða þeirra bar að. Hún hefur aðeins sagst rannsaka tengsl líkfundanna tveggja.

Konan sem bjó í íbúðinni í Wittigen var þrítug. Hún fannst látin á hótelberginu í Bæjaralandi ásamt 53 ára gömlum karlmanni og 33 ára gamalli konu. AP-fréttastofan segir að karlmaðurinn og eldri konan hafi fundist á rúmi þar sem þau héldust í hendur. Þau höfðu verið skotin nokkrum örvum í höfuðið og brjóstið. Þau voru búsett í bænum Berod í suðvesturhluta Þýskalands.

Yngri konan fannst látin í blóði sínu á gólfi herbergisins. Hún hafði verið skotin einni ör í gegnum brjóstið. Það er hún sem var búsett í Wittingen þar sem lík kvennanna tveggja fundust.

Tveir lásbogar fundust á herberginu sem virðast hafa verið notaðir. Þriðji ónotaði boginn fannst í poka í dag. Lögreglan hefur sagt að ekkert bendi til þess að nokkur annar hafi komið nálægt dauða fólksins.