Lífið

Segir sjómenn miklu kynþokkafyllri en bændur

Jakob Bjarnar skrifar
Jonni telur mikilvægt að sjómenn, sem hann fullyrðir að séu miklu kynþokkafyllri en bændur, toppi þá með æsilegri myndum af sér í vinnunni.
Jonni telur mikilvægt að sjómenn, sem hann fullyrðir að séu miklu kynþokkafyllri en bændur, toppi þá með æsilegri myndum af sér í vinnunni.

Sjómenn eru miklu kynþokkafyllri en bændur,“ segir Jonni Þorvaldar trillusjómaður á Skagaströnd. Hress. Hann hefur birt mynd af sér kviknöktum á sinni trillu, úti á rúmsjó nema hann heldur þorski fyrir því allra heilagasta. Til að alls velsæmis sé gætt.

Jonni hefur skorað á aðra sjómenn að sýna bændum, sem hafa vakið athygli fyrir það að birta af sér myndir á samfélagsmiðlum, þar sem þeir eru kviknaktir en eru þó jafnan með sauðfé við klof sér svo slátrið blasi ekki við, í tvo heimana.

Málið til umræðu í flotanum

Mynd Jonna eru viðbrögð við þessu fári sem fer sem eldur í sinu um sveitir landsins. Sú er kveikjan. „Það var svo lítið að gera í gær og þá datt mér þetta í hug. Gaman að svona fíflagangi,“ segir Jonni. En, myndin hefur vakið verulega athygli að hans sögn og viðbrögð mikil. Ein vinkona hans deildi myndinni og benti í leiðinni á að Jonni sé á lausu. Hann er á besta aldri, rétt að verða 43 ára gamall. Og spengilegur eins og títt er um sjómenn.

Einn félaga Jonna hefur svarað kallinu. Hann segir að það það þurfi miklu fleiri ef það á að taka bændur í bólinu með þetta.

„Þetta vakti mikla lukku í samfélaginu í gær. Og einn hefur svarað kallinu. Þeir mega vera fleiri,“ segir Jonni og vill fá hópefli í flotanum um þetta verkefni. Hann vill sýna bændum í tvo heimana. „Sjómenn yfirleitt til í sprellið. Þetta var mikið rætt á milli okkar í gær og verið að ýta á menn að taka áskoruninni. Sjómenn mega ekki vera minni menn í þessum efnum en bændur.“

En, hver tók myndina?

Jonni segir að aldraður faðir hans hafi sett sig í spæjaragírinn, hringt í sig og velt því fyrir sér, af því Jonni er einn á sínum báti, hver hefði eiginlega tekið myndina?

„Ég þurfti að útskýra fyrir honum að allar myndir eru með „timer“ þannig að það er hægt að stilla símanum upp og láta hann taka myndina sjálfur,“ segir Jonni hlæjandi.

Að sögn Jonna ganga veiðarnar treglega. Það sé lítið af fiski eins og er. En, þetta er nú býsna vænn fiskur sem þú heldur fyrir því allra heilagasta?

„Já, en maður er bara að fá svo fáa.“
 

Engar torkennilegar hneigðir undirliggjandi

Strípalingaháttur bænda í sauðburði hefur sem áður sagði vakið athygli. Og reyndar hefur vegansamfélagið tekið þessu uppátæki afar illa. Fyllyrt er að berrassaðir bændur hafi reitt vegansamfélagið til reiði. Jafnvel rætt um dýraníð. Jonni skilur varla spurninguna; að þarna séu einhverjar torkennilegar hneigðir undirliggjandi. Né vill hann meina að það sé djúpt á þessari hneigð, að vilja fækka fötum.

„Ekki séð neitt slíkt. Þetta er hreint og klárt grín. Það var svo lítið að gera, ég fékk þessa flugu allt í einu í hausinn. Í einhverju bríarí. Svona er hausinn á manni skrítinn. Það er alltaf tími fyrir fíflagang,“ segir Jonni fjallhress og ítrekar áskorun sína til sjómanna, þeir verði að toppa bændurna.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.