Tómas Lemarquis og Ólafur Darri hópfjármagna svarta kómedíu

Hópfjármögnun stendur nú yfir fyrir nýja stuttmynd sem skartar þeim Tómasi Lemarquis og Ólafi Darra Ólafssyni í aðalhlutverkum en myndinni er lýst sem svartri og súrrealískri kómedíu sem sækir innblástur sinn í Jim Henson, Terry Gilliam og Ingmar Bergman.

Myndin ber titilinn „The Rock of Ages“ og fjallar um fornan hermann, sem leikinn er af Tómasi, sem kemst í furðuleg kynni við talandi stein en Ólafur Darri fer með hlutverk steinsins. Í lýsingu á vef Indiegogo segir að sagan sé um ofbeldisfullan hermann sem gerir hræðilega hluti í þeirri trú að það muni gera hann ódauðlegan en hlutirnir taka óvænta og grátbroslega stefnu þegar hann kemst í kynni við steininn talandi.

Myndin er tekin upp á Íslandi og er hugarfóstur leikstjórans Eron Sheean sem leikstýrði meðal annars myndinni „Errors of the Human Body“ en hann kynntist Tómasi við gerð þeirrar myndar og vildu þeir starfa meira saman.

„Við áttum langar samræður fram á nótt um það að okkur langaði að gera mynd. Nóttina eftir þessar samræður dreymir hann draum þar sem er talandi steinn sem varð svo hugmyndin að myndinni upphaflega,“ segir Tómas í samtali við Vísi.

Sheean, sem kemur upprunalega frá Ástralíu, fékk mikinn innblástur frá Íslandi og má sjá sterka skírskotun í íslenska sagnahefð í myndinni. Myndin dansar á mörkum hins raunverulega og er erfitt að sjá hvort atburðarásin sé einungis hugarheimur hermannsins eða raunveruleikinn.

Mikil vinna hefur verið lögð í gerð myndarinnar og hafa leikmunir verið gerðir sem styrktaraðilar geta eignast gegn styrktarframlagi. Þá geta styrktaraðilar komist á kreditlista myndarinnar fyrir aðeins þriggja punda framlag, sem samsvarar tæplega fimm hundruð íslenskum krónum.

Fjármögnun stendur yfir til 18. maí og er stefnan sett á fimmtán þúsund pund, um 2,3 milljónir íslenskra króna, en nú þegar hafa safnast rúmlega fjögur hundruð þúsund krónur.

Söfnunina má finna hér.