Innlent

Getur ekki leyft sér að syrgja og heldur áfram að leita bróður síns

Margrét Helga Erlingsdóttir skrifar
Jón Þröstur hvarf sporlaust í Dyflinni 9. febrúar síðastliðinn en Davíð Karl bróðir hans segir fjölskyldu hans langt frá því að hafa gefist upp á leitinni.
Jón Þröstur hvarf sporlaust í Dyflinni 9. febrúar síðastliðinn en Davíð Karl bróðir hans segir fjölskyldu hans langt frá því að hafa gefist upp á leitinni.
„Mann dreymir að maður hafi fundið hann eða séð hann og svona er þetta búið að vera í næstum einn og hálfan mánuð.“

Þetta segir Davíð Karl Wiium um bróður sinn Jón Þröst Jónsson sem hvarf sporlaust í Dyflinni fyrir tæpum einum og hálfum mánuði síðan. Davíð greinir frá stöðunni í leitinni og opnar sig um andlega líðan sína í viðtali í útvarpsþættinum Harmageddon.

Ekkert hefur spurst til Jóns Þrastar síðan hann gekk út af hóteli og út á götur Dyflinnar að morgni laugardagsins 9. febrúar. Jón Þröstur verður 42 ára á þessu ári og er fjögurra barna faðir. Davíð segist ekkert hafa sofið fyrstu vikurnar eftir að Jón Þröstur hvarf.

„Á meðan ég veit ekki neitt þá get ég ekki fullyrt neitt. Þetta er voðalega óþægileg staða og erfið fyrir alla. Maður verður einhvern veginn bara að reyna að halda áfram og halda þessu í einhverjum farvegi,“ segir Davíð. Hvar Jóns Þrastar hafi legið þungt á sálarlífi allra sem tengjast honum.

Getur hvorki leyft sér að syrgja né fagna

„Þetta er voðalega skrítið, og bara fyrir mitt leyti, þegar var farið að líða á fyrstu vikuna þá var ég alveg sannfærður um að eitthvað hræðilegt hefði gerst og að hann væri mjög líklega látinn en eftir því sem tíminn líður og maður skoðar þetta þá fyllist maður kannski ákveðinni von eftir því sem maður heldur áfram og eins og staðan er á mér og mörgum akkúrat í dag þá hef ég ekki hugmynd,“ segir Davíð. Hann geti hvorki leyft sér að syrgja sé hann fallinn frá né leyft sér að fagna sé hann á lífi.

 

Staðan orðin ansi svört

 

Davíð segir að ef Jón Þröstur er látinn þá sé afar skrítið að jarðneskar leifar hans hafi ekki komið í ljós. Ef hann væri einhvers staðar í sjálfheldu væri hann líklegast fundinn.

„Ég vona svo innilega að hann sé óhultur einhvers staðar en auðvitað er þetta orðin ansi svört staða“.

 

Furðulegt mál

 

Þegar Davíð er spurður hvort líkur séu á því að einhver hafi unnið honum mein eða jafnvel hvort hann hafi jafnvel unnið sjálfum sér mein svarar Davíð:

„Eitthvað gerðist hvað sem það hefur verið. Það hefur þá væntanlega eitthvað saknæmt átt sér stað. Hann hafi unnið sér sjálfum mein eða látið sig hverfa eða jafnvel lent í slysi og það kemur vel til greina en auðvitað, ef hann hefur ákveðið að vinna sér sjálfum mein eða lent í slysi eða átökum eða annað þá væru yfirgnæfandi líkur á að maðurinn væri fundinn og þess vegna er þetta nú svo furðulegt mál. Það er ansi erfitt að fela sig, sérstaklega ef þú liggur einhvers staðar slasaður.“

Davíð bendir á að það séu um 6 kílómetrar niður að höfn en þá sé einnig á sem renni í gegnum miðbæinn. Bæði strandlengjan og svæðið með fram ánni eru ákaflega fjölfarnir staðir.

 

Hefði viljað aðstoð björgunarsveitarinnar fyrr

 

Aðspurður segir Davíð að samskiptin við írsk lögregluyfirvöld hafa verið góð. Lögreglan hafi komið vel fram og hafi verið til staðar. Þegar honum hafi gefist tími til að gaumgæfa atburðarás síðastliðinna vikna séu þó nokkur atriði sem hann hefði viljað að lögreglan gerði öðruvísi.

Það hefði verið betra að fá írsku björgunarsveitina fyrr sérstaklega til að geta útilokað ákveðin svæði strax. Davíð hefði kosið að lögreglan hefði sett upp vegatálmana upp miklu fyrr og herja á leigubílana af fullum krafti.

Þrátt fyrir að Davíð geti fundið að ýmsum þáttum í leitinni segist hann heilt yfir vera ánægður með störf írsku lögreglunnar. Það sé afar auðvelt að kenna öðrum um þegar fólk er orðið þreytt og pirrað en það sé hans tilfinning að írska lögreglan sé að gera allt sem í þeirra valdi sé til að hjálpa fjölskyldunni.

Í spilaranum hér að neðan er hægt að hlusta á viðtalið í heild sinni.


Tengdar fréttir




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.