Svarar Friðjóni fullum hálsi og hafnar „talnaleikfimi Fréttablaðsins og fyrirtækjaeigenda“

Kolbeinn Tumi Daðason skrifar 22. febrúar 2019 10:17

Gunnar Smári á kosningavöku Sósíalistaflokksins síðastliðið vor. fréttablaðið/eyþór

Gunnar Smári Egilsson, stofnandi Sósíalistaflokksins og fjölmiðlamaður, segist ekki kannast við harðskeytta orðræðu hjá sér eða fulltrúum verkalýðshreyfingarinnar. Ef einhver þori ekki í framboð til formanns VR vegna þess að viðkomandi sé hræddur við sig þá eigi viðkomandi ekki mikið erindi í að vera fulltrúi fólks í kjarabaráttu.

Þetta kom fram í máli Gunnars Smára í útvarpsþættinum Harmageddon á X-inu í morgun. Þangað voru þeir Friðjón R. Friðjónsson, framkvæmdastjóri og eigandi KOM almannatengsla, mættir til að ræða kjaramál í kjölfar Facebook-færslu Friðjóns sem fór á flug í gær.

Sagðist Friðjón telja verkalýðshreyfinguna vaða uppi með ofbeldi og svívirðingum. Það geri hún undir forystu Gunnars Smára og skósveina hans. Sagði Friðjón að enginn hefði lagt í framboð til formanns VR af ótta við Gunnar Smára.

„Talnaleikfimi“ í blaði dagsins

Óhætt er að segja að þeir Friðjón og Gunnar Smári séu á öndverðri skoðun hvað varðar kjaramálin. Ekki var frétt Fréttablaðsins í morgun til að sameina þá frekar en þar er fullyrt að kröfur Starfsgreinasambandsins feli í sér að laun meginþorra félagsmanna hækki um 70-85 prósent á næstu þremur árum.

„Þetta er bara einhver talnaleikfimi í Fréttablaðinu og fyrirtækjaeigendum,“ sagði Gunnar Smári. Grunnkrafan væri að hækka lægstu laun úr 300 þúsund krónum í 425 þúsund krónur sem svaraði til rúmlega 40 prósenta hækkunar. Til að fólk gæti lifað af lengur en til 22. hvers mánaðar.

Þá sagðist hann alltaf hafa verið sannfærður um að enginn færi fram gegn Ragnari Þór Ingólfssyni sem var á dögunum endurkjörinn formaður VR án mótframboðs.

„Ég veit ekki hvort VR væri betur sett að fá einhvern sem formann sem þorir ekki í kosningar. Þorir ekki að mæta mér sem er venjulegur maður með Facebook-síðu úti í bæ. Ef hann þorir ekki í mig, hvað þá með samningaviðræður?“

Klippa: Harmageddon - Tilboð ríkisstjórnarinnar óskiljanlegur afleikur í stöðuna

„Myndir þú ekki svara ef ráðist væri á eiginkonu þína?“

Sagði Gunnar Smári umræðuna óma af því að VR hefði verið í eigu Sjáfstæðisflokksins á sínum tíma. Það hefði breyst eftir hrun með einni undantekningu.

„Það hefur einn klassískur Sjálfstæðismaður náð kjöri. Einar Stefán, Eða Stefán Einar,“ sagði Gunnar Smári. Þá hefðu atkvæðin dreifst mjög en í næstu kosningum hefði Stefán Einar (Stefánsson) tapað. Upp úr sauð á milli Gunnars Smára og Stefáns Einars í Silfrinu á dögunum.

Friðjón studdi fullyrðingar sínar um harðskeytta orðræðu Gunnars Smára með dæmi sem töluvert hefur verið fjallað um í fjölmiðlum. Starfslok fjármálastjóra Eflingar til langs tíma sem neitaði að greiða reikninga frá eiginkonu Gunnars Smára sem brást illa við með skrifum sínum.

„Myndir þú ekki svara ef ráðist væri á eiginkonu þína?“ sagði Gunnar Smári og Friðjón játaði því. Gunnar Smári og eiginkona hans Alda Lóa Leifsdóttir fóru um landið, á vegum Eflingar, og tóku viðtöl við láglaunafólk. Hundrað manns að sögn Gunnars Smára.

Hann fullyrðir að 160-170 þúsund manns, innan ASÍ og BSRB, standi að baki kröfum verkalýðshreyfingarinnar.

„Þegar fólk er risið upp þá er tími til að setjast niður og semja. Það er eins og SA og ríkisstjórnin skilji ekki alvarleika þessa máls,“ sagði Gunnar Smári.

„Hér á ekki að þekkjast fátækt.“

Fjölmiðlar Kjaramál Sósíalistaflokkurinn

Tengdar fréttir

Mest lesið

Fleiri fréttir