Erlent

Sérfræðingar greina breytingar á hreim Meghan eftir að hún giftist Harry

Kristín Ólafsdóttir skrifar
Harry Bretaprins og Meghan Markle á viðburði í London þann 12. febrúar síðastliðinn.
Harry Bretaprins og Meghan Markle á viðburði í London þann 12. febrúar síðastliðinn. Getty/Samir Hussein

Meghan Markle hertogaynja af Sussex hefur verið undir smásjá fjölmiðla síðan hún tók saman við Harry Bretaprins. Sérfræðingar velta því nú fyrir sér hvort bandarískur hreimur Meghan hafi orðið fyrir áhrifum af þeim breska og komast sumir að þeirri niðurstöðu að svo sé.

Meghan er fædd í Kaliforníu í Bandaríkjunum og talar ensku með bandarískum hreim. Hún er nú búsett í Bretlandi með eiginmanni sínum, Harry Bretaprins, en þau gengu í hjónaband með pompi og prakt í maí í fyrra.

Sjá einnig: Varar við því að Markle gæti hlotið sömu örlög og Díana prinsessa

Í umfjöllun breska ríkisútvarpsins BBC er rætt við nokkra sérfræðinga í málvísindum og þeir beðnir um að leggja mat á það hvort hreimur hertogaynjunnar hafi breyst eftir að hún flutti til Bretlands.

Hljóðfræði- og framburðarsérfræðingurinn Geoff Lindsey segir í samtali við BBC að mál og framburður Meghan virðist hafa breyst, í það minnsta við ákveðin tilefni. Þar nefndi hann sérhljóða á stangli sem hafi orðið fyrir breskum áhrifum.

Dæmi um þetta megi heyra í framburði Meghan á enska orðinu „all“. Þannig heyrist greinilegur breskur framburður á orðinu í máli Meghan þar sem hún ræðir við aðdáendur í Cheshire í júní í fyrra. Hann heyrist hins vegar ekki í framburði Meghan á sama orði í viðtali sem tekið var við hana og Harry í kjölfar trúlofunar þeirra árið áður.



Þá bendir Lindsey á framburð Meghan á spurningunni „Did you make that for us?“, eða „Bjóstu þetta til handa okkur?“, sem hún bar undir aðdáanda í Birkenhead í janúar síðastliðnum. Þar sé hreimurinn greinilega frekar breskur en bandarískur.
 

 
 
 
View this post on Instagram
#MeghanMarkle greeted well wishers in Birkenhead today - she even met two classmates called Megan and Harry! : @emilynashhello
A post shared by HELLO! US (@hellomagus) on

Marisa Brook, aðstoðarprófessor í málvísindum við Háskólann í Toronto, bendir jafnframt á að Meghan hafi þróað með sér sérstakan aðalshreim sem hún beiti í samskiptum við almenning í Bretlandi. Brook, sem hefur sérhæft sig í breytingum á talsmáta fólks í sviðsljósinu, segir að Meghan hafi tileinkað sér þessar bresku áherslur viljandi. Áherslunum megi jafnframt líkja við fínan kjól, þ.e. um sé að ræða eins konar búning sem Meghan bregði sér í til að passa inn í ákveðnar aðstæður.

Flestir sérfræðinganna eru þó sammála um að breytingar á hinum bandaríska hreim hertogaynjunnar séu afar litlar. Sumir þeirra eru enn fremur á því að afar hæpið sé að halda því fram að nokkrar breytingar hafi orðið á hreim Meghan eftir að hún giftist Harry Bretaprins.

Töluvert var fjallað um hreim bandarísku tónlistarkonunnar Madonnu snemma á öldinni en hún hefur dvalið langdvölum í Bretlandi. Madonna var sögð hafa smitast verulega af breskum hreim Lundúnabúa á sínum tíma en hér að neðan má sjá myndband þar sem farið er yfir þróunina.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.