Innlent

Sjúkrahótelið afhent í dag

Sunna Kristín Hilmarsdóttir skrifar

Framkvæmdum er lokið við sjúkrahótel Nýs Landspítala við Hringbraut og klukkan 14 í dag hófst athöfn við hótelið þar sem það er afhent með formlegum hætti.

Í tilkynningu segir að sjúkrahótelið sé fyrsti áfangi í heildaruppbyggingu Nýs Landspítala við Hringbraut en aðrar byggingar eru meðferðarkjarninn, rannsóknahús og bílastæða,- tækni- og skrifstofuhús.

Landspítalinn mun sjá um rekstur sjúkrahótelsins og hefur verið greint frá því að stefnt sé að opnun þess í apríl næstkomandi.

„Dagurinn í dag markar tímamót í heilbrigðisþjónustu við alla landsmenn og er í takt við stefnu ríkisstjórnarinnar í uppbyggingu heilbrigðisþjónustunnar. Meðal annars mun opnun sjúkrahótelsins stuðla að því mikilvæga markmiði að sjúklingar fái þjónustu á réttu og viðeigandi þjónustustigi, líkt og er leiðarstef í þeirri heilbrigðisstefnu sem nú er til umfjöllunar á Alþingi,“ er haft eftir Svandísi Svavarsdóttur, heilbrigðisráðherra, í tilkynningu.

Svandís Svavarsdóttir, heilbrigðisráðherra, og Páll Matthíasson, forstjóri Landspítalans, við athöfnina í dag. vísir/vilhelm

Mikilvægur áfangi við að tryggja fyrsta flokks heilbrigðisaðstöðu

Þar er einnig haft eftir Bjarna Benediktssyni, fjármálaráðherra, að sjúkrahótel sé mikilvægur áfangi við að tryggja fyrsta flokks heilbrigðisaðstöðu fyrir landsmenn.

„Sjúklingar, aðstandendur þeirra, fjölskyldur - fjölbreyttur hópur fólks af öllu landinu mun njóta góða af þeirri góðu aðstöðu sem hér er að finna og það fer ekki fram hjá neinum sem fer um húsið að hér hefur verið vandað til verka og hugað að hverju smáatriði. Ég vona að sjúkrahótelið styðji við rekstur spítalans og létti álagi af honum þar sem allt of oft er verið að nota of dýr úrræði til að leysa vanda sjúkra. Hér eru fjölbreytt tækifæri, bæði tengd gistirýmum en einnig annarri þjónustu sem hægt að er veita hér t.d. á grundvelli þess glæsilega eldhúss sem komið hefur verið upp. Væntanlega skýrast slíkir þættir betur verði reksturinn boðinn út að loknum samningstímanum við LSH,“ segir Bjarni.

Þeir sjást hér Bjarni Benediktsson, fjármálaráðherra, og fyrrverandi heilbrigðisráðherrarnir Óttarr Proppé, Jón Kristjánsson og Svavar Gestsson, sem jafnframt er faðir núverandi heilbrigðisráðherra, en við hlið hans stendur kona hans, Guðrún Ágústsdóttir. vísir/vilhelm

Fjórar hæðir, kjallari og 75 herbergi

„Sjúkrahótelið veitir Landspítala kærkomið tækifæri til að efla enn frekar þjónustu við sjúklinga og fjölskyldur þeirra. Stefnt er að að opnun hótelsins núna á vordögum, vonandi í aprílmánuði. Tilkoma hótelsins markar sömuleiðis ákveðin tímamót í uppbyggingu Landspítalaþorpsins við Hringbraut þar sem framkvæmdir við aðrar nýbyggingar okkar þar eru löngu hafnar og ganga vel. Framundan eru spennandi tímar,“ er svo haft eftir Páli Matthíassyni, forstjóra Landspítalans, í tilkynningu.

Sjúkrahótelið er fjórar hæðir og kjallari. Fjöldi herbergja er 75 að fjölbreyttri en á hótelinu og er aðstaða fyrir fatlaða og stærri herbergi fyrir fjölskyldur.

Hótelið er 4.258 fermetrar að stærð (brúttó), 14.780 rúmmetrar (brúttó), með móttöku, veitingasal, sólstofu, vinnuaðstöðu hjúkrunarfræðinga og samtengt Landspítalanum með kjallara og tengigöngum.

Afhending lyklanna gekk ekki áfallalaust fyrir sig en kannski að fall sé fararheill. Vísir/Vilhelm

Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.