Martin í úrslitaleik bikarsins

Martin Hermannsson mun spila til úrslita í þýsku bikarkeppninni í körfubolta eftir öruggan sigur á Frankfurt í undanúrslitaleiknum í dag.

Lið Alba Berlín byrjaði leikinn mjög vel og átti frábæran fyrri hálfleik sem lagði grunninn að sigrinum. Munurinn á liðunum var 28 stig í hálfleik og þegar upp var staðið fór Berlín með 35 stiga sigur 105-70.

Martin var í byrjunarliðinu hjá Berlín í dag og spilaði um tuttugu mínútur, hann hafði þó frekar hægt um sig miðað við oft áður með 7 stig og þrjár stoðsendingar.

Í úrslitaleiknum mætir Berlín annað hvort Bamberg eða Bonn, úrslitin fara fram um miðjan febrúar.