Senda tillitslausum ökumönnum tóninn eftir að ekið var á lögreglubíl á slysstað

Lögreglumönnum á Suðurnesjum varð verulega brugðið vegna tillitsleysis ökumanna í þeirra garð á vettvangi slyss á Strandarheiði í morgun. 

Þar hafði bifreið farið út af veginum en Reykjanesbrautin liggur yfir Strandarheiði og segir lögreglan mikla hálku hafa verið á veginum í morgun. Hámarkshraði á Reykjanesbrautinni við bestu aðstæður eru 90 kílómetrar á klukkustund en lögreglan segir aðstæður í morgun hafa verið langt frá besta móti. 

„Lögreglumenn á vettvangi töluðu um að ökumenn sem óku á hægri akreininni hafi ekki svo mikið sem hægt á sér við vettvanginn og sagði einn lögreglumaður sem var á vettvangi við kollega sinn að þetta myndi ekki enda vel,“ segir í tilkynningu frá lögreglunni á Suðurnesjum.

Sú varð raunin en fimm mínútum eftir að lögreglumaðurinn hafði látið þessa orð falla var ekið aftan á lögreglubifreiðina með þeim afleiðingum að lögreglubifreiðin er talsvert skemmd og hin bifreiðin að öllum líkindum ónýt.

 

„En það versta að okkar menn og ökumaður hins bílsins finna til eymsla eftir óhappið. Það er einlæg ósk okkar að ökumenn sýni tillitssemi í kringum slysavettvanga og dragi verulega úr hraðanum er þeir nálgast vettvanginn til að koma í veg fyrir frekari slys. Förum varlega í umferðinni, ökum miðað við aðstæður og sýnum hvoru öðru tillitssemi,“ segir í tilkynningunni.