Jón Axel skoraði helming stiga Davidson og tryggði þeim sigurinn

Jón Axel Guðmundsson fór á kostum í liði Davidson háskólans er liðið vann eins stigs sigur, 54-53, á Saint Louis á heimavelli í dag.

Jón Axel og félagar voru þremur stigum yfir í hálfleik 24-21 en leikurinn var afar spennandi. Saint Louis leiddi er fjórtán sekúndur voru eftir af leiknum, 53-52.

Þá greip Grindvíkingurinn til sinna ráða. Hann nældi í tvö vítaskot er fimm sekúndur voru eftir og setti þau bæði niður. Hann tryggði því þar með Davidson sigurinn með minnsta mun, 54-53.

Jón Axel var frábær í liði Davidson. Hann var lang stigahæsti leikmaður liðsins en hann gerði 27 stig, helming stiga liðsins. Að auki tók hann fimm fráköst og gaf eina stoðsendingu.

Sara Rún Hinriksdóttir gerði níu stig og tók níu fráköst er Canisius vann 62-49 sigur á Rider í háskólabolta kvenna í kvöld en Canisius var einu stigi yfir í hálfleik, 31-30.

Thelma Dís Ágústsdóttir var næst stigahæst hjá Ball State sem tapaði 65-62 fyrir Western Michigan, 65-62, í spennuleik. Thelma skoraði ellefu stig og tók fjögur fráköst.

WHAT A GAME AND WHAT AN @OrthoCarolina FINAL SCORE! #CatsWin #TCC pic.twitter.com/vOBncOuLFT

— Davidson Basketball (@DavidsonMBB) January 26, 2019