Átta ára YouTube-stjarna, sem heldur úti gríðarvinsælli leikfangarás á miðlinum, er sá hæst launaði í stéttinni, samkvæmt nýrri úttekt Forbes fyrir árið 2019.
Ryan Kaji var fjögurra ára þegar hann hóf, í samráði við foreldra sína, að birta myndbönd á YouTube undir merkjum Ryan‘s Toys Review. Þar tók Kaji leikföng úr pakkningunum, sagði frá þeim og gagnrýndi þau.
Rásin, sem nú heitir Ryan‘s World, eða Heimur Ryans, öðlaðist gríðarmiklar vinsældir á skömmum tíma og státar nú af um 23 milljónum áskrifenda.
Kaji er talinn hafa þénað um 26 milljónir Bandaríkjadala á árinu, eða um 3,2 milljarða íslenskra króna. Það er fjórum milljónum Bandaríkjadala meira en tekjur hans árið áður.
Aðrir sem komust á lista Forbes yfir þær YouTube-stjörnur sem þénuðu mest árið 2019 voru m.a. Dude Perfect, vinahópur sem framkvæmir lygileg, og oft íþróttatengd, áhættuatriði, með 20 milljónir Bandaríkjadala og hinn sænski Felix Kjellberg, eða PewDiePie, með þrettán milljónir.
Hér að neðan má sjá myndband úr smiðju Ryan's World.
Tekjuhæsta YouTube-stjarnan er átta ára og þénaði þrjá milljarða á árinu
