Vöktuðu vettvang brunans til miðnættis

Slökkvilið höfuðborgarsvæðisins kláraði vinnu sína á vettvangi brunans við Dalshraun í Hafnarfirði á miðnætti. Samkvæmt upplýsingum frá varðstjóra hjá slökkviliðinu voru slökkviliðsmenn með svokallaða „eldvakt“ á staðnum til að koma í veg fyrir að eldur tæki sig upp aftur en slökkvistarfinu sjálfu lauk fyrr um kvöldið.

Búið er að afhenda lögreglu vettvanginn og fást ekki upplýsingar um eldsupptök hjá slökkviliðinu. Að sögn varðstjóra varð töluvert tjón á húsnæðinu við Dalshraun en einnig komst mikill reykur og vatn inn á lager í verslun Húsasmiðjunnar sem er í sömu byggingu. Vinna slökkviliðsmanna í gærkvöldi sneri einkum að hreinsun í versluninni.

Fimmtíu manns búa í húsinu að Dalshrauni en bjarga þurfti íbúum af svölum hússins eftir að eldurinn kviknaði. Aðrir komust út af sjálfsdáðum en engin slys urðu að fólki.