Tony Omos dæmdur fyrir að framvísa fölsuðum skilríkjum

Héraðsdómur Reykjaness hefur dæmt Tony Omos í 30 daga fangelsi, skilorðsbundið til tveggja ára, fyrir skjalafals við hælisumsókn hans árið 2015. Tony, sem öðlaðist landsfrægð í Lekamálinu svokallaða, játaði brot sitt án undandráttar og kom það til refsilækkunar, sem og hreint sakavottorð hans og óútskýrður dráttur á rannsókn málsins.

Í dómi héraðsdóms er þess getið að Tony hafi í september 2015 fengið lögmann sinn til að leggja fram „grunnfalsað ökuskírteini frá Nígeríu,“ þangað sem Tony á rætur að rekja, við Útlendingastofnun vegna umsóknar hans um hæli hér á landi.

Það telst varða við 155. grein hegningarlaga, þar sem segir að hver sá sem notar falsað skjal, til þess að blekkja með því í lögskiptum, skuli sæta fangelsi allt að 8 árum. Við þingfestingu málsins játaði Tony brot sitt og þótti þar með sannað að hann hafi gerst sekur um skjalafals.

Lengd fangelsisdómsins tók mið af játningunni sem og sú staðreynd að ekkert virðist benda til þess að hann hafi áður gerst sekur um refsiverða háttsemi. Sakavottorð Tony, sem er ríkisborgari Nígeríu, lá þó ekki frammi í málinu.

„Fyrir liggur að mikill óútskýrður dráttur varð á rannsókn máls þessa og útgáfu ákæru. Að því gættu þykir ekki annað koma til álita en fresta fullnustu refsingar ákærða og skal refsingin falla niður að liðnum tveimur árum frá uppkvaðningu dóms þessa að telja haldi ákærði almennt skilorð,“ segir í dómi héraðsdóms sem kveðinn var upp í síðustu viku.

Lekamálið hafi enn áhrif

Sem fyrr segir varð Tony Omos landsfrægur eftir að röngum og ærumeiðandi upplýsingum um hann og barnsmóður hans var lekið úr innanríkisráðuneytinu haustið 2013. Aðstoðarmaður innanríkisráðherra hlaut átta mánaða dóm fyrir hafa lekið upplýsingunum. Innanríkisráðherra, Hanna Birna Kristjánsdóttir, sagði jafnframt af sér „[t]il að skapa frið um störf ráðuneytisins og til að hlífa þeim sem þetta mál hefur bitnað illa á,“ eins og Hanna Birna orðaði það í afsagnaryfirlýsingu sinni.

Þrátt fyrir að næstum fimm ár séu liðin frá afsögn Hönnu Birnu hefur Tony sagt Lekamálið enn hafa merkjanleg áhrif á líf sitt. Hann eigi erfitt með að fá vinnu og hafi jafnvel íhugað að skipta um nafn. Hann býr nú í Reykjanesbæ en segist hafa hugleitt að flytja til Reykjavíkur til að auka möguleika sína á því að finna starf.