Meiðsli aftan í læri hafa haldið Martin frá

Martin Hermannsson hefur ekki spilað með liði Alba Berlin að undanförnu vegna vöðvameiðsla aftan í læri.

Martin meiddist í öðrum leik úrslitaeinvígis Evrópubikarsins gegn Valencia en spilaði þrátt fyrir það þriðja og síðasta leikinn, þar sem Berlin varð að láta sér silfur gott heita.

Eftir þann leik, sem var 15. apríl, hefur Berlínarliðið leikið fjóra deildarleiki en Martin ekki verið með.

Hann sagði í samtali við Morgunblaðið í gærkvöld að það væri vegna þess að blætt hefði inn á vöðva aftan í vinstra læri.

„Ég gæti svo sem alveg verið að spila en þeir vilja hafa mig 100 prósent fyrir úrslitakeppnina. Læknirinn fær að ráða í þessu tilviki,“ sagði Martin við Morgunblaðið.

Alba Berlín er í þriðja sæti þýsku Bundesligunnar þegar sex leikir eru eftir áður en átta liða úrslitakeppni tekur við. Martin sagði að meiðslin héldu honum frá í tvær til þrjár vikur, en það verða komnar tvær vikur frá síðasta leik sem hann spilaði núna á mánudaginn næsta.