„Heilagur andi“ bjargaði ökumanni frá hraðasekt

Þýskum ökumanni á hraðferð var á dögunum bjargað frá 15.000 króna hraðasekt þegar að snjóhvít dúfa flaug fyrir hraðamyndavél í þann mund sem smellt var af. BBC greinir frá.

Samkvæmt lögregluembættinu í Viersen í vesturhluta Þýskalands var ökumaðurinn á 54 kílómetra hraða þar sem hámarkshraði er 30 km/h. Hraðamyndavélin smellti eins og áður segir af en sökum dúfunnar var eingöngu hægt að bera kennsl á bílinn en ekki ökumanninn.

Í tilkynningu lögreglunnar sagði að mögulega hafi ekki um tilviljun verið að ræða „Mögulega er ekki tilviljun að holdgervingur hins heilaga anda hafi skorist í leikinn, sagði í tilkynningunni og var þar vísað í dúfuna sem oft er notuð sem táknmynd Guðs í kristni.

Þar sem ekki reyndist unnt að bera kennsl á ökumanninn var málið látið niður falla „þökk sé verndardúfunni.“ Lögreglan sagði einnig að í raun ætti að sekta dúfuna fyrir framferðið en þar sem að styttist í Hvítasunnudag sleppur hún með skrekkinn.