Búist við 500-600 bátum á strandveiðum í sumar

Fyrsti dagur strandveiðanna er í dag að þær færa jafnan mikið líf í hafnir landsins hringinn í kringum landið þegar milli fimm- og sexhundruð smábátar bætast við flóru fiskveiðanna. Breytt lög tryggja hverjum báti núna að lágmarki tólf veiðidaga í hverjum mánuði fram til ágústloka. Þetta kom fram í hádegisfréttum Bylgjunnar.

Á þessum fyrsta veiðidegi eru 257 smábátar komnir með strandveiðileyfi, um tíu prósent færri en á sama tíma í fyrra, en þá voru þeir 284 talsins. Örn Pálsson, framkvæmdastjóri Landssambands smábátaeigenda, segir reynsluna þó sýna að þeim muni fjölga hratt á næstu vikum en í fyrra voru alls 548 bátar sem fengu leyfi til strandveiða. Örn á allt eins von á því að þeir verði fleiri í ár enda sé fiskverð núna hærra og veiðigjöldin lægri. 

Þá hefur orðið grundvallarbreyting á fyrirkomulagi strandveiðanna, sem fest var í sessi með lagabreytingum Alþingis, sem tóku gildi í síðasta mánuði. Áður voru þetta einskonar kappveiðar þar sem strandveiðisjómenn ruku af stað í upphafi hvers mánaðar, oft í misjöfnum veðrum, til að ná sem mestum afla áður en pottur hvers veiðisvæðis kláraðist.

Núna er hverjum báti tryggðir tólf veiðidagar í hverjum mánuði og geta strandveiðisjómenn valir sjálfir hvenær innan mánaðarins þeir halda til veiða, frá mánudegi til fimmtudags. Hverjum báti er heimilt að koma með allt að 775 kíló að þorski að landi á dag. Þá hefur heildarveiðikvóti strandveiðanna verið aukinn úr 10.200 tonnum í fyrra upp í 11.000 tonn ár. 

Strandveiðarnar hleypa jafnan miklu lífi í sjávarbyggðir hringinn í kringum landið á sumrin en þær eru bundnar við mánuðina maí, júní, júlí og ágúst. Í fyrra var Patreksfjörður í efsta sæti og Bolungarvík í öðru sæti yfir þær hafnir þar sem mestum strandveiðiafla var landað.

Hér má heyra frétt Bylgjunnar: