Hægt hefur á hagvexti á evrusvæðinu

Hagvöxtur jókst um 0,4 prósent á evrusvæðinu fyrstu þremur mánuðum ársins. Hægt hefur á hagvexti í ríkjum Evrópska myntbandalagsins eftir kröftugan vöxt á árinu 2017.

Þetta er 0,7 prósent lakari vöxtur en á síðasta ársfjórðungi ársins 2017 og hefur hagvöxtur á evrusvæðinu ekki aukist jafn lítið frá sumrinu 2016 að því er fram kemur í Financial Times.



Minni væntingar neytenda, tölur um minni útflutning hjá Þjóðverjum en spár gerðu ráð fyrir og minni framleiðni veittu vísbendingar um að hagvaxtaraukning yrði minni á þessu ári en í fyrra. FT segir að álitaefnið sem stjórnvöld í evruríkjunum standi frammi fyrir snúist um það hvort hægari vöxtur sé tímabundinn eða hvort hann sé það sem koma skal á árinu. 

Mario Draghi, bankastjóri Seðlabanka Evrópu, sagði í síðustu viku að bankinn myndi fylgjast náið og varfærnislega með hagtölum næstu mánaða. Draghi sagði hins vegar að menn væru bjartsýnir að hagkerfi evrusvæðisins verði nægilega kröftugt til að styðja við verðbólgu rétt undir 2 prósenta verðbólgumarkmiði Seðlabanka Evrópu en peningamálastefna bankans felst í því að halda verðbólgu undir en þó eins nálægt 2 prósent á ári og hægt er, með tilliti til verðþróunar á evrusvæðinu í heild.