Dómarinn skoraði í færeyska kvennahandboltanum

Afar óvenjulegt mark var skorað í færeyska kvennahandboltanum um helgina og setti færeyska sjónvarpið myndband af því inn á fésbókarsíðu sína.

Það var ekki nóg með að karlmaður hafi skorað mark í kvennaleik heldur var hinn sami einnig dómari leiksins.

Örvhenta skyttan átti þrumuskot sem markvörðurinn varði en frákastið fór í dómarann sem stóð við hlið marksins og þaðan framhjá markverðinum og í markið.

Leikmenn mótmæltu en eftir örstuttan umhugsunarfrest þá dæmdi dómarinn markið gilt. Það fylgdi þó ekki sögunni hvort hann hafi skráð markið á sjálfan sig.

Hér fyrir neðan má sjá þetta ótrúlega mark.

Stelpurnar héldu áfram að kvarta í dómaranum sem yppti bara öxlum og sagði þeim að halda áfram. Dómarinn er víst hluti af leiknum og markið því gilt.