Sjáðu Vigni skjóta Holstebro í úrslit bikarsins með flautumarki frá miðju | Myndband

Vignir Svavarsson skoraði sigurmark Tvis Holstebro í danska bikarnum í handbolta í 26-25 sigri á Ribe Esbjerg í dag með skoti frá miðju þegar lokaflautið gall.

Vignir var fljótur að hugsa þegar aðeins nokkrar sekúndur voru eftir og skoraði með skoti frá miðju á meðan andstæðingurinn skipti inn markmanni á ný.

Holstebro byrjaði leikinn vel á heimavelli og leiddi með fjórum mörkum í hálfleik, 15-11, en leikmenn Esbjerg virtust ætla að ná að koma þessu í framlengingu.

Ribe-Esbjerg hafði jafnað metin með skoti þegar níu sekúndur voru eftir en á meðan skiptin fóru fram var Vignir fljótur að hugsa og setti boltann í autt netið.

Í úrslitunum mætir Holstebro GOG á morgun eftir níu marka sigur GOG gegn Álaborg fyrr í dag.

Myndband af marki Vignis má sjá hér.