Stefán Rafn áfram sjóðheitur í Ungverjalandi

Enn á ný var Stefán Rafn Sigurmannsson atkvæðamikill í liði Pick Szeged í ungversku úrvalsdeildinni í handbolta, en Pick vann átta marka sigur í kvöld, 35-26, á Váci.

Leikið var á heimavelli Váci, en Pick Szeged var sjö mörkum yfir í hálfleik 18-11. Eftirleikurinn varð því auðveldur, en Pick hefur verið á miklu flugi.

Stefán Rafn var markahæstur hjá liðinu, en hann skoraði átta mörk. Stefán Rafn hefur verið sjóðandi heitur hjá ungverska liðinu í vetur og verið að skora mikið af mörkum.

Szeged er í öðru sæti, tveimur stigum á eftir Veszprém, en síðara liðið á þó leik til góða. Pick hefur leikið 19 leiki af 26.