Neikvæð tíu marka sveifla á fjórum dögum

Eftir jafntefli, 30-30, og fína frammistöðu gegn Slóveníu á miðvikudaginn tapaði íslenska kvennalandsliðið í handbolta illa fyrir sama liði, 28-18, í Celje í gær. Ísland er því áfram með eitt stig í sínum riðli í undankeppni EM 2018.

„Við spiluðum mjög vel á miðvikudaginn þar sem sóknarleikurinn gekk virkilega vel. Við byrjuðum ekki nógu vel í dag [í gær] og vorum ekki nógu áræðnar og náðum ekki að færa þær til eins og við óskuðum okkur. Við stoppuðum of snemma í fyrstu eða annarri árás í staðinn fyrir að gera fleiri árásir og eiga möguleika á að opna stærri svæði,“ segir landsliðsþjálfarinn Axel Stefánsson í samtali við Fréttablaðið.

„Við misstum boltann klaufalega og þetta var svona Hawaii-handbolti eins og maður segir stundum.“

Íslenska liðið var fimm mörkum undir í hálfleik, 15-10, þrátt fyrir frábæra frammistöðu Hafdísar Renötudóttur í markinu. Hún varði 11 skot í fyrri hálfleiknum, eða 42% þeirra skota sem hún fékk á sig.

„Við vorum einni fleiri í lokasókninni í fyrri hálfleik en klikkum á sendingu og þær skora. Í staðinn fyrir að minnka muninn í þrjú mörk juku þær hann í fimm mörk. Það er mjög dýrt í svona leik. Við þurfum að læra af þessu,“ segir Axel og bætir við að íslenska liðið þurfi að geta tæklað stressið betur þegar það spilar á erfiðum útivöllum.

„Við þurfum að fara yfir það hvað við hefðum getað spilað öðruvísi og af hverju við nýtum ekki þau færi sem við fengum. Við spiluðum ekki nógu vel úr því sem við lögðum upp með og þegar við gerðum það kláruðum við ekki færin okkar nógu vel,“ segir Axel.

En sér hann eitthvað jákvætt við leikinn, þrátt fyrir 10 marka tap?

„Maður getur alltaf grafið upp eitthvað jákvætt. Við komum ágætlega út úr þessu hvað vörnina varðar og fáum nokkuð góða markvörslu í gegnum leikinn. Þetta fer inn á reynslubankann hjá ungu liði,“ svarar Axel. Ísland á eftir að mæta Tékklandi og Danmörku í undankeppninni.