Trump-liðar kæra Kaliforníu vegna nethlutleysis

Dómsmálaráðuneyti Bandaríkjanna hefur kært yfirvöld Kaliforníu vegna lagasetningar um nethlutleysi. Kalifornía hefur sett ströngustu lög um nethlutleysi sem sést hafa í kjölfar þess að ríkisstjórn Donald Trump, forseta Bandaríkjanna, felldi reglur um nethlutleysi úr gildi í fyrra.



Nethlutleysi felur í sér að fjarskiptafyrirtæki þurfi að veita öllum upplýsingum sem send eru um netið sömu meðferð.

Lög Kaliforníu voru samþykkt í gær og einungis nokkrum klukkustundum síðar lýsti Dómsmálaráðuneytið því yfir að lögin yrðu kærð á þeim grundvelli að einstök ríki gætu ekki sett slík lög. Það væri á borði alríkisstjórnar Bandaríkjanna, þar sem að í rauninni væri um að ræða viðskipti á milli ríkja. Lögunum er ætlað að taka gildi þann 1. janúar.

Ríkisstjórn Trump hefur áður höfðað mál gegn Kaliforníu vegna laga ríkisins um umhverfisvernd og innflytjendur.

Vald sem ekk eigi að vera á höndum fárra

Xavier Becerra, dómsmálaráðherra Kaliforníu, sagði í gær að ríkisstjórn Trump væri að hunsa vilja milljóna Bandaríkjamanna sem hefðu lýst yfir eindregnum stuðningi við nethlutleysi. Þá sagði hann ríkið hýsa fjöldann allan af sprotafyrirtækjum, tæknirisum og um 40 milljónir netnotenda. Yfirvöld Kaliforníu myndu ekki leifa nokkrum valdamiklum aðilum að ráða því hvaðan íbúar fái upplýsingar og hvaða síður eigi að vera lengur en aðrar að hlaðast inn.

Heilt yfir litið var niðurfelling nethlutleysis sigur fyrir stóra þjónustuaðila Bandaríkjanna eins og Comcast Corp, AT&T og Verizon Communications Inc. Tæknifyrirtæki eins og Facebook, Amazon og Alphabet (móðurfélag Google) voru andsnúin niðurfellingunni.

Samkvæmt lögum Kaliforníu mega þjónustuaðilar ekki hægja á síðum né rukka fyrirtæki fyrir hraðari aðgang eða streymi. Forsvarsmenn smærri fyrirtækja segjast hafa áhyggjur af því að ráða ekki við að greiða þjónustuaðilum til að tryggja dreifingu efnis þeirra.

Mörg önnur ríki Bandaríkjanna vinna að eigin lagasetningu varðandi nethlutleysi, samkvæmt Washington Post, og því þykir líklegt að málið muni jafnvel fara fyrir Hæstarétt Bandaríkjanna.