„Ætlum að taka sigra í þessari Evrópukeppni“

Íslenska kvennalandsliðið í handbolta spilar mikilvægan leik við Slóveníu í undankeppni EM 2018 í Laugardalshöllinni í kvöld.

Ísland tapaði fyrstu tveimur leikjum sínum í undarkeppninni og þar af fékk liðið stóran skell gegn Dönum í síðasta leik í Höllinni. Því verður liðið að ná að minnsta kosti í stig, helst tvö, í leiknum í kvöld.

„Það er alltaf þannig að við ætlum að vinna alla leiki sem við förum í. Við erum að byggja upp liðið og tökum það skref fyrir skref,“ sagði Axel Stefánsson, landsliðsþjálfari, á blaðamannafundi HSÍ fyrir leikinn í kvöld.

„Mikilvægast er að við sýnum framfarir og spilum betri leik. Þá hef ég fulla trú á að úrslitin komi og við náum að vinna.“

Slóvenar eru með sterkt lið sem vann meðal annars Frakkland í fyrsta leik sínum á HM í desember síðast liðnum, en Frakkar unnu það mót og urðu Heimsmeistarar.

„Þær eru með gríðarlega góða hægri skyttu í Ana Gros og við verðum að stoppa hana. Hún er með rúmlega 9 mörk á meðaltali í leik á síðasta HM þannig að það verður lykilþátturinn að stoppa hana varnarlega.“

„Svo verðum við að fá hraðaupphlaupsmörk og ná að hreyfa þær sóknarlega svo við komumst í góð skotfæri og nýta svo færin þegar þau koma. Það er uppskriftin; góð vörn, hraðaupphlaup og nýta færin.“

Karen Knútsdóttir, einn reynslumesti leikmaður liðsins, er komin aftur í liðið eftir meiðsli og stórskytta Olís deildarinnar ,Ragnheiður Júlíusdóttir, sem gaf ekki kost á sér í síðasta verkefni er í liðinu.

„Góðir leikmenn sem koma þarna inn. Það eru margar ungar og Karen kemur með góða reynslu inn í ungt lið. Ragnheiður er einn af okkar ungu og efnilegu leikmönnum með hörku góð skot þannig að þær gefa okkur virkilega mikið og gefa okkur nýja möguleika sóknarlega.“

Ísland komst síðast í lokakeppni stórmót á EM í Serbíu 2012. Það var þriðja stórmótið í röð, stelpurnar höfðu einnig verið á HM í Brasilíu 2011 og EM 2010. Síðan þá hefur lítið gengið hjá íslenska liðinu og var Ísland í 4. og lakasta styrkleikaflokki þegar dregið var í riðla undankeppninnar.

„Þetta snýst bara um vinnu. Breiddin eykst gríðarlega í kvennahandboltanum og það eru fleiri og fleiri þjóðir sem verða betri.“

„Við eigum margar ungar stelpur sem æfa vel og eru að gera góða hluti hérna í Olís deildinni. Margir spennandi leikir sem leikmenn fá reynslu af að spila í og við þurfum að byggja þetta skref fyrir skref.“

„Maður nær aldrei neinum hástökkum í þessu, þetta er endalaus vinna og þá kemur árangurinn.“

„Við höfum breytt varnarleiknum okkar og svo erum við að vinna með útfærslu á sóknarleiknum og það tekur tíma. Ég held þetta komi allt saman, við höfum okkar stefnu og ætlum að taka sigra í þessari Evrópukeppni. Svo verður bara að sjá hvort það verði nóg til að komast eitthvað áfram.“

„Svo koma ný mót ár eftir ár og það er mikilvægt að við tökum skref fyrir skref upp þar,“ sagði Axel Stefánsson.

Leikur Íslands og Slóveníu hefst klukkan 19:30 í Laugardalshöll og er frír aðgangur fyrir alla aldurshópa.