Leiðtogar Kóreuríkjanna áttu óvæntan fund á landamærunum

Leiðtogar Norður- og Suður-Kóreu áttu óvæntan fund á landamærum ríkjanna í morgun. Ekki var tilkynnt um fundinn fyrir fram en leiðtogarnir hittust í fyrsta sinn í sögu ríkjanna í síðasta mánuði. Sá fundur var haldinn á sama stað, á hlutlausu svæði á landamærunum.

Fundurinn þykir hafa gengið vel og bendir það til þess að allt kapp sé lagt á að endurvekja leiðtogafund Trumps Bandaríkjaforseta og Kim Jong-un í Singapore.



Upphaflega stóð til að fundurinn yrði tólfta júní næstkomandi en Trump aflýsti honum eftir harðorðar yfirlýsingar frá stjórnvöldum í Pyongyang. Nú segir Trump að árangursríkar viðræður hafi átt sér stað um að halda fundinum til streitu eftir allt saman.

Sú ákvörðun Trumps, að aflýsa fundinum, kom forseta Suður-Kóreu í opna skjöldu. Hann mun hafa þrýst á báða aðila að koma aftur að samningaborðinu og í kjölfarið var sáttatónn í yfirlýsingum frá Norður-Kóreu.