Dæmdur fyrir að áreita flugfreyju þegar hann olli uppnámi í flugvél

Héraðsdómur Reykjavíkur dæmdi Alfreð Örn Clausen í fjögurra mánaða skilorðsbundið fangelsi í dag, meðal annars fyrir að hafa áreitt flugfreyju um borð í flugvél Icelandair kynferðislega. Hann var jafnframt dæmdur til að greiða flugfreyjunni hálfa milljón króna í bætur.

Alfreð Örn var ákærður fyrir kynferðislega áreitni, brot gegn lögum um loftferðir og brot gegn valdstjórninni. Þá lagði flugfreyjan fram einkaréttarkröfu gegn honum vegna áreitninnar.

Í dómnum kemur fram að Alfreð Örn hafi látið öllum illum látum um borð í flugvél Icelandair sem var á leið frá Toronto í Kanada til Íslands haustið 2014. Hann hafi ítrekað farið gegn fyrirmælum flugstjóra og flugverja um góða hegðun og reglu.

Þannig hafi Alfreð Örn meðal annars staðið tvisvar upp úr sæti sínu í flugtaki, angrað og áreitt aðra farþega og hunsað flugverja sem skipuðu honum að róa sig og sína stillingu.

Stakk fingri upp undir pils í átt að rassi

Flugfreyjan sem hann áreitti þurfi ítrekað að gera hlé á störfum sínum til að ræða við Alfreð Örn. Í nokkur þeirra skipta sló hann hana á rassinn og strauk rass hennar utanklæða. Þá setti hann stút á munninn og reyndi að kyssa flugfreyjuna og stakk fingri uppundir pils hennar í átt að rassi hennar.

Greip hann einnig ítrekað í handlegg flugfreyjunnar og reyndi að toga hana inn í sætaröðina til sín þar til aðrir farþegar og flugverja komu henni til aðstoðar við að yfirbuga Alfreð Örn. Var hann á endanum handjárnaður og fjötraður við sæti sitt.

Við þær aðfarir marðist flugfreyjan á hægri framhaldlegg, hægra læri og hægri kálfa. Eftir að Alfreð Örn var fjötraður var hann æstur og braust um og æpti hótandi og tvíræðum ókvæðisorðum að þeim flugverjum sem, til skiptis, urðu að gera hlé á störfum sínum til að sitja hjá honum, og að farþega sem í tvígang sat hjá honum.

Þá var Alfreð Örn ákærður fyrir að sparka í fótlegg lögrglumanns á lögreglustöðinni að Hverfisgötu í Reykjavík í apríl í fyrra.

Alfreð Örn játaði sök og leit dómurinn til þess og að þrjú ár væru liðin frá brotunum um borð í flugvélinni við ákvörðun refsingar. Hann var dæmdur í fjöggura mánaða skilorðsbundið fangelsi.

Sakaferill Alfreðs Arnar var hins vegar ekki talinn hafa þýðingu fyrir úrlausn málsins. Hann var meðal annars eftirlýstur af lögreglu í Kaliforníu í Bandaríkjunum árið 2015 vegna umfangsmikils fjársvikamáls. Interpol gaf út alþjóðlega handtökuskipun á hendur honum. Hann var sakaður um að hafa svikið milljarða króna út úr viðskiptum lögfræðistofu.