Hátt í sextíu verkefni á borð lögreglu í gærkvöldi

Kvöldvaktin var mjög erilsöm hjá lögreglunni á höfuðborgarsvæðinu í gærkvöldi en hátt í sextíu verkefni komu inn á borð lögreglu. 

„Því miður þá er ekki hægt að upplýsa mikið um verkefnin þar sem lögreglumenn hafa ekki komist inn til að klára frágang málanna í upplýsingakerfum lögreglu. Því verður aðeins fjallað lauslega um þetta nú um hvaða mál hafa komið inn á borð lögreglu,“ segir í dagbók lögreglu sem barst skömmu eftir miðnætti.

Þar er sagt frá eignaspjöllum í Kópavogi þar sem rúður voru brotnar í bifreiðum og einnig frá umferðaróhappi þegar ekið var á bifreið á Miðbakka í Reykjavík en tjónvaldur ók af vettvangi. 

Ökumaður var handtekinn á Sæbraut vegna gruns um ölvunarakstur en ljósabúnaður var jafnframt ekki í lagi og fjarlægja þurfi skráningarnúmer bifreiðarinnar.

Um klukkan 21:30 voru ökumenn handteknir í Hafnarfirði og Kópavogi vegna ölvunar og eða fíkniefnaakstur. Málið fékk hefðbundna meðferð að því er segir í dagbók lögreglu.

„Fjöldi aðstoðarbeiðna komu til lögreglu vegna minniháttar slysa, veikinda, ölvunarláta, innbrotsboða, hugsanlegs elds, bifreiðastöður, aðskotahlutar á vegi sem olli hættu og þjófnaðar ef eitthvað mætti telja upp.“

Verkefni næturinnar virðast þó hafa verið öllu færri, en tilkynnt var um  bruna skömmu fyrir miðnætti sem reyndist minniháttar en kviknað hafði í jólaskreytingu. 

Upp úr hálf fjögur í nótt sinnti ökumaður ekki stöðvunarmerkjum lögreglu. Ók meðal annars gegn akstursstefnu og endaði það með umferðaróhappi. Minniháttar slys voru á fólki en eitthvað tjón á bílum, þar á meðal lögreglubíl.