Viðskipti innlent

WOW air verður „ofurlággjaldaflugfélag“ ef Indigo fylgir sömu stefnu

Þorbjörn Þórðarson skrifar
Skúli Mogensen stofnandi og forstjóri WOW air.
Skúli Mogensen stofnandi og forstjóri WOW air. Vísir/vilhelm
Búast má við miklum breytingum á rekstri WOW air á næstunni ef Indigo Partners mun fylgja sömu stefnu gagnvart WOW air og fyrirtækið hefur fylgt gagnvart öðrum lággjaldaflugfélögum sem það hefur fjárfest í. Þetta segir forstjóri fraktflugfélagsins Bluebird Nordic sem hefur meira en 20 ára reynslu á flugmarkaði.

Uppsagnarbréf beið fimmtán starfsmanna WOW Air þegar þeir mættu til vinnu í morgun. Að sögn Svanhvítar Friðriksdóttur, upplýsingafulltrúa WOW air, vinna flestir starfsmennirnir á flugvellinum í Keflavík og skýrir hún uppsagnirnar með vísan til árstíðabundinnar sveiflu.

Uppsagnirnar komu strax í kjölfar tilkynningar um kaup bandaríska fjárfestinarfélagsins Indigo Partners á hlut í WOW air en tengjast henni þó ekki með beinum hætti.

Ekki hefur verið gefið upp hversu stóran hlut Indigo Partners eignast í WOW air. Um er að ræða bráðabirgðasamkomulag sem er háð ýmsum fyrirvörum og kaupin eru því ekki frágengin ennþá. Í tilkynningu sem birtist á vefsíðu WOW air kemur fram að Skúli Mogensen muni áfram vera aðaleigandi Wow air en skilmálar samkomulagsins eru ekki gefnir upp að öðru leyti.

Indigo Partners eru með höfuðstöðvar í Phoenix í Bandaríkjunum. Félagið sérhæfir sig í fjárfestingum í lággjaldaflugfélögum og er dæmis aðalfjárfestirinn í Tiger Airways í Singapúr og Spirit Airlines á Flórída. Þá er Indigo einn stærsti hluthafinn í ungverska lággjaldaflugfélaginu Wizz air sem flýgur meðal annars til og frá Íslandi. Skúli Mogensen varð ekki við ósk um viðtal og bar fyrir sig trúnað gagnvart Indigo Partners.

Steinn Logi Björnsson, forstjóri fraktflugfélagsins Bluebird Nordic, hefur meira en tveggja áratuga reynslu af flugmarkaði en hann var um tuttugu ára skeið í framkvæmdastjórn Icelandair. Hann segir að Indigo Partners hafi fylgt sömu aðferðafræði í öllum flugfélögum sem fyrirtækið hefur fjárfest í.  

Steinn Logi Björnsson forstjóri Bluebird Nordic.

Taka alla þjónustuliði út úr fargjaldinu

„Þeir hafa einbeitt sér að „ultra low cost" og það er gert með því að taka alla þjónustuliði út úr fargjaldinu. Það er allt selt. Það er mun lengra gengið en WOW air hefur gert. Þetta hafa þeir gert með Spirit í Bandaríkjunum og Wizz air og fleiri slík félög. Svo eru þeir með lægri launakostnað svo það er margt sem ekki endilega rímar í dag við WOW air. Það kemur fram í tilkynningunni að þeir hafi ákveðnar hugmyndir um þær breytingar sem þeir vilja ráðast í og ég hugsa að þær hljóti að vera í þessa átt,“ segir Steinn Logi.

Flugfélögin sem Indigo Partners hefur fjárfest í hafa haft þrýst niður launakostnaði og eru laun hjá þessum félögum mun lægri en það sem gengur og gerist annars staðar. .

Munu íslenskir flugmenn sætta sig við slík laun? „Ég myndi halda að núverandi launakostnaður hjá WOW air samræmdist ekki þeirra hugmyndum um um ultra low cost félög svo maður spyr sig hvort þeir séu að horfa mikið til Íslands. Hvort þeir séu endilega að horfa mikið til tengibankans í Keflavík eða hvort þeir séu kannski meira að horfa á vörumerkið WOW air og beint flug yfir Atlantshafið (án viðkomu í Keflavík innsk.blm). Ef maður horfir á þau félög sem þeir hafa fjárfest í þá finnst manni það vera líklegra.“

Steinn Logi segir að bráðabirgðasamkomulag um kaupin sé ákveðin viðurkenning á þeim verðmætum sem felast í vörumerki WOW air og uppbyggingu félagsins á síðustu árum. „Ég held að árangurinn sem WOW hafi náð svona hratt felist í því að koma nafni WOW air á markað fyrir lægstu fargjöld. Það getur hins vegar falið í sér veikleika líka. Ef það er eina ástæðan til að fljúga með félaginu að þar séu lægstu fargjöld þá verður það erfitt þegar kostnaður snýst gegn mönnum, þegar eldsneytiskotnaður hækkar, gengið breytist og annað slíkt. En það má segja að markaðslega séð sé þetta mesti árangurinn hjá WOW air enda hafa stórir fjölmiðlar erlendis reglulega vísað til lægstu fargjalda WOW air í umfjöllun um lággjaldaflugfélög í flugi yfir Atlantshafið.“

Mörgum spurningum ósvarað

Mörgum spurningum er ósvarað varðandi bráðabirgðasamkomulag um kaup Indigo Partners í WOW air. Til dæmis liggur ekki fyrir hversu langt viðræður Skúla Mogensen við Indigo Partners voru komnar þegar Skúli skrifaði bréf til þeirra sem eiga skuldabréf WOW air síðastliðinn þriðjudag. Í bréfinu vísaði hann til áhuga annarra en Icelandair. „Við höfum unnið af kostgæfni að því að útvega viðbótarfjármögnun og höfum fundið fyrir áhuga frá fjölmörgum aðilum auk Icleandair, eins og opinberlega hefur verið greint frá,“ segir Skúli í bréfinu. Á þessum tímapunkti var um talsveirt meira en einfaldan áhuga að ræða af hálfu Icelandair enda lág fyrir undirritaður kaupsamningur á borðinu, áreiðanleikakönnun stóð yfir hjá endurskoðunarfyrirtækinu Deloitte og Samkeppniseftirlitið var að meta áhrifin af samrunanum á samkeppni. Ummælin féllu enda í grýttan jarðveg hjá stjórn Icelandair Group. Í gær var svo greint frá því að hætt hefði verið við samrunann. Ein helsta ástæðan var að stjórnendur Icelandair Group töldu meiri áhættu fylgja kaupunum en lagt var upp með í fyrstu. Grundvallaðist þar mat meðal annars á niðurstöðum áreiðanleikakönnunar.  


Tengdar fréttir

Óþreyju gætir meðal leigusala WOW air

Mörg mál standa enn út af í viðræðum Icelandair og WOW air. Stjórnendur Ice­landair vilja ekki að flugmenn WOW air verði á sama kjarasamningi og flugmenn Icelandair. Vaxandi óþreyju gætir á meðal eigenda flugvéla í rekstri WOW air.

Þurfi að taka á sig tugprósenta afskriftir

Icelandair þrýstir á að félagið standi undir talsvert minni hluta af höfuðstól skuldabréfaeigenda WOW air. Greinandi Landsbankans segir það ekki koma á óvart ef hluthafafundi Icelandair á föstudag verði frestað.

Skúli lagði 770 milljónir til WOW

Fimm og hálf milljón evra, af þeim 60 sem WOW Air tryggði sér með skuldabréfaútboði flugfélagsins í september, kom úr vasa forstjórans.

Bjartsýnn á að önnur flugfélög fylli í skarðið

Aðalhagfræðingur Íslandsbanka segist bjartsýnn á að höggið á efnahagslífið við mögulegt brotthvarf félagsins yrði viðráðanlegt og að ferðaþjónustan og hagkerfið myndu rétta úr kútnum fyrr en seinna.

„Áhætta við kaupin var meiri en við gerðum ráð fyrir“

Bogi Nils Bogason forstjóri Icelandair Group segir að stjórn og stjórnendur félagsins hafi komist að þeirri niðurstöðu að áhætta við kaup Icelandair Group á WOW air hafi verið meiri en gert hafi verið ráð fyrir. Ákvörðun um að falla frá samruna var tekin eftir að niðurstöður úr áreiðanleikakönnun Deloitte lágu fyrir.

Einhugur um að hætta við kaupin á WOW air

Stjórnarformaður Icelandair segir einhug um að hætta við kaupin á WOW air hafa ríkt innan stjórnarinnar. Hvorki var komið á hreint hver stór hlutur Skúla í Iceland­air hefði orðið né hvort samkomulag næðist við skuldabréfaeigendur WOW air.

Skúli segist reikna með gleðifréttum í mjög náinni framtíð

Skúli Mogensen segir að það sé ekkert launungarmál að hans helsta markmið sé að WOW air verði áfram sjálfstætt flugfélag. Unnið sé að því og hann reikni með að geta fært starfsfólki WOW air gleðifréttir í mög náinni framtíð.

Fimmtán sagt upp hjá Wow Air

Svanhvít segir fyrst og fremst um að ræða starfsmenn fyrirtækisins á Keflavíkurflugvelli.

Mikilvægt að eyða óvissu því WOW air flytur fjóra af hverjum tíu farþegum

Airport Associates sem þjónustar WOW air sagði upp 237 starfsmönnum í dag en það er nær helmingur starfsfólks fyrirtækisins. Forstjórinn segir það varúðarráðstöfun. Hagfræðingar í greiningardeildum bankanna segja að það sé mikilvægt að eyða óvissu um framtíð WOW air sem fyrst.






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.