Um 190 milljarða króna vinningspottur gekk út

Vitað er um einn vinningshafa hið minnsta í bandaríska Mega Millions lotteríinu í gær. Vinningspotturinn í útdrætti gærkvöldsins var um 1,6 milljarður Bandaríkjadala, um 190 milljarður íslenskra króna. Lottópotturinn var sá stærsti í sögu Bandaríkjanna.

BBC greinir frá því að einn vinningsmiði hafi selst í Suður-Karólínu. Ekki er útilokað að fleiri vinningsmiðar hafi selst.

Einfaldur miði kostar einn Bandaríkjadal og mynduðust víða langar raðir fólks í verslunum vegna áhugans á útdrættinum.

Vinningstölurnar voru 28, 70, 5, 62, 65 þar sem „megatalan“ var 5. Líkurnar á að vera með réttar tölur eru sagðar einn á móti 300 milljónum.

Skattskyldur

Vinningurinn er skattskyldur og mun vinningshafinn, sé hann á annað borð einn, fá greiddar út 913 milljónir Bandaríkjadala. Einnig er boðið upp að fá vinninginn greiddan út í smærri upphæðum næstu 29 árin.

Mega Millions lotteríið er selt í 44 ríkjum Bandaríkjanna, District of Columbia og Bandarísku jómfrúreyjum. Fyrstu vinningur hafði ekki gengið út síðan í júlí sem skýrir hinn háa vinningspott.