Lítil von um að fleiri finnist á lífi eftir fellibyl á Flórída

Að minnsta kosti átján manns fórust af völdum fellibylins Mikaels þegar hann gekk yfir suðaustanverð Bandaríkin í síðustu viku og búist er við því að tala látinna hækki enn meira. Lítil von er nú talin til þess að fleiri finnist á lífi á norðvestanverðu Flórída.

Leitað hefur verið að eftirlifendum og líkum látinna um helgina. Sjálfboðaliðar við leit og björgun hafa þegar fundið hundruð íbúa á svæðunum sem var saknað. Slökkviliðsstjórinn í Panama-borg á Flórída segir að aðgerðir nú um helgina beinist hins vegar frekar að því að endurreisa samfélagið þar eftir hamfarirnar.

„Við sólarupprás byrjum við aftur á leitinni. Við vonum að við finnum fleiri [á lífi] en það er meira og meira ólíklegt,“ segir Alex Baird slökkviliðsstjóri.

Rafmagnsleysi og símasambandsleysi hefur háð björgunarstörfum, að sögn Reuters-fréttastofunnar. Talið er að það gæti tekið einhverjar vikur að koma rafmagni aftur á alls staðar. Þá er nauðstatt fólk á svæðinu sagt skorta drykkjarvatn og matvæli.