Hringdi dyrabjöllum að næturlagi með ólar um úlnliðina

Lögregla í Texas-ríki í Bandaríkjunum leitar konu sem hringdi dyrabjöllum nokkurra húsa í íbúahverfi norðan við Houston seint um nótt. Ferðir konunnar náðust á öryggismyndavél en í myndbandinu virðist hún vera með ólar um úlnliðina.

Samkvæmt frétt BBC var konan á bak og burt þegar íbúi hússins kom til dyra. Hún hringdi einnig dyrabjöllum annarra húsa á svæðinu en ekkert hefur spurst til hennar síðan.

Ólarnar sem konan bar um úlnliðinn þykja mögulega benda til þess að hún hafi verið bundin niður. Þá var hún aðeins klædd í stuttermabol og var berfætt. Lögregla segir konuna þó ekki samræmast lýsingum á konum sem hafa verið skráðar týndar Bandaríkjunum.

Lögregla í Montgomery-sýslu deildi myndbandinu á Facebook-síðu sinni á sunnudag. Þar biðlaði lögregla til allra sem kynnu að hafa upplýsingar um konuna að hafa samband við lögreglu.