Innlit Íslands í dag í steggjun Friðriks Dórs

Í síðustu viku var söngvarinn Friðrik Dór Jónsson steggjaður. Einn liður í steggjuninni voru tónleikar sem auglýstir voru með afar litlum fyrirvara.

Ísland í dag slóst í för með hópnum sem steggjaði Friðrik og mætti Kjartan Atli Kjartansson á tónleikana sem voru í hádeginu fyrir viku en þeir voru haldnir við Pylsubarinn í Hafnarfirði og fengu gestir ókeypis pylsur.

Gulli og Felix stýrðu gleðinni og þurfti hinn gallharði FH-ingur að troða upp í Haukabúning.

Friðrik Dór stóð sig frábærlega á tónleikunum en fékk síðan aðra þraut sem hann þurfti að leysa og það var að stökkva út í Hafnarfjarðarhöfn á sundskýlunni einni.

„Alltaf þegar ég gigga á Pulsubarnum þá stekk ég út í sjó,“ sagði söngvarinn í samtali við Kjartan Atla.

Rapparar Ísland komu fram

„Þetta var alveg æðislegt hjá honum og skemmtilegt hvernig hann náði að tvinna sögu sína inn í þessa tónleika. Lagavalið fjölbreytt og bara virkilega vel leyst,“ sagði bróðir Friðriks, sjálfur Jón Jónsson.

Eftir tónleikana fór hópurinn saman í Go-Kart og skemmtu sér vel. Síðar meir var Friðrik aftur tekinn út á sjó og dreginn af miklum hraða á sérstakri blöðru. Þar fleytti hann í raun kellingar á vatninu við mikinn fögnuð drengjanna. 

Um kvöldið var farið í heimahús og mikið teiti fór fram þar sem Herra Hnetusmjör og Emmsjé Gauti komu meðal annars fram. 

Meðal þeirra sem voru að steggja Frikka Dór eru Benedikt Valsson, Jón Jónsson, Skúli Jón Friðgeirsson, Boði Logason, Ásgeir Örn Hallgrímsson, drengirnir í Stop Wait Go, Eyjólfur Óli Eyjólfsson, Máni Pétursson og fleiri vinir tónlistarmannsins.

Hér að neðan má sjá heimsókn Íslands í dag í steggjun Friðriks Dórs.