Á annað hundrað þúsund manns í miðbænum

Á þriðja hundrað viðburðir eru skipulagðir í Reykjavíkurborg á Menningarnótt sem verður sett nú í hádeginu. Búist er fleiri en hundrað þúsund manns sæki miðborgina heim og segir borgarstjóri að með mikilli skipulagningu þoli innviðir borgarinnar alla þá aðsókn sem verður fram á kvöld.

Fyrir tveimur árum var gefið út að rúmlega 120 þúsund manns hafi sótt viðburði Menningarnætur í miðborginni en á síðasta ári treystu yfirvöld sér ekki til að gefa út nákvæman fjölda en sagði að aldrei hefði eins margir komið saman í miðborginni á einum degi.

Búist er við því að fjöldi þeirra sem sækja viðburði Menningarnætur í ár veði með mesta móti.

Dagur B. Eggertsson, borgarstjóri setur hátíðina á Hafnartorgi nú í hádeginu þar sem vakin verður athygli á svæðinu sem mun gjörbreyta ásýnd borgarinnar með tengingu gamla miðbæjarins við hafnarsvæðið.

„Ég held að þetta sé fyrir löngu orðin allsherjar hátíð þar sem maður hittir fólk og heilsar náunganum og kynnist nýjum kimum í borginni sem maður hefur ekki kynnst áður og það eru beinlínis skemmtilega og áhugaverð atriði í öðru hvoru húsasundi og öðru hverju horni í miðborginni og raunar víðar,“ segir Dagur B. Eggertsson Borgarstjóri.

Umfangsmiklar götulokanir eru í miðborginni í tilefni hátíðarinnar og Reykjavíkurmaraþons en miðborgin er gerð að allsherjargöngugötu til þess að tryggja öryggi vegfarenda. En frítt verður í almenningsvagna Strætó og strætó-skutlur í boði á ákveðnum stöðum í borginni.

Dagur hefur ekki áhyggjur af því að Menningarnótt komi til með að reyna um og of á innviði borgarinnar.

„Við höfum rætt þetta á þeim nótum og í rauninni má segja að borgin ásamt slökkviliði, lögreglu, björgunarsveitum og öðrum viðbragðsaðilum líti öðrum fræðum á þetta sem svona æfingu í að allt gangi vel fyrir sig þó að það sé flókið og mikið undir. Lykil atriðið til þess að allt gangi ver er að fólk njóti dagsins,“ segir Dagur.

Viðburðurinn hefur tekið breytingum á undanförnum árum þegar borgaryfirvöld sáu alfarið um þá menningarviðburði sem í boði voru. Í dag sé flestir skipulagðir viðburðir í höndum einstaklinga, fyrirtækja og félagasamtaka.



„Fegurðin í þessu er að borgarbúar eru að leggja til hugmyndaauðgina, þennan margbreytileika frá ári til árs og bara allan þennan kraft sem við sjáum í tónlistinni og bara öllu sem er boðið uppá á Menningarnótt,“ segir Dagur.



Dagur og fjölskylda hafa síðastliðin tíu ár bakað vöfflur fyrir gesti og gangandi og opnað heimili sitt á þessum degi en í ár verður breyting á.

„Við erum auðvitað bara eins og hver annar gestur sem er að koma í fyrsta skipti í 10 ár og finna út hvað er skemmtilegast að gera,“ segir Dagur

Allar upplýsingar Menningarnætur svo sem viðburði og götulokanir má finna á vefsíðunni Menningarnótt.is.