Kominn á leið yfir Ermarsundið

Sjósundskappinn Jón Kristinn Þórsson lagði af stað yfir Ermarsundið frá Shakespeare strönd í Dover, Englandi í morgun. Hann lagði af stað klukkan 5:28 að staðartíma (4:28 að íslenskum tíma).

Jón Kristinn er vanur sjósundi en hann hefur meðal annars synt Drangeyjarsund og frá Vestmannaeyjum til Landeyjarsands.

Ermarsundið í beinni sjólínu er 34 kílómetrar, en vegna strauma eru vanalega um það bil 50-60 kílómetrar syntir.

Með Jóni í för eru Ermarsundsfararnir Benedikt Hjartarson og Sigrún Þ. Geirsdóttir. Einnig eru þeir Jóhanness Jónsson og Arnar Þór Egilsson honum til aðstoðar.

Þegar Vísir heyrði í Jóhannesi um klukkan níu í morgun var Jón búinn að synda 17 kílómetra.

Vanalega hafa sundkappar verið að synda Ermarsundið á um það bil 14-18 klukkustundum. 

Erfitt er að áætla hvenær Jón mun koma í mark vegna strauma og fleiri þátta sem eiga eftir að koma í ljós.

Jón Kristinn ræddi við Bítið í vikunni, hér má hlusta á það.