Hér getur þú séð hvort að þínum gögnum var deilt með Cambridge Analytica

Facebook hefur birt tól þar sem notendur geta komist að því hvort að upplýsingum um þá var deilt með hinu umdeilda breska fyrirtæki Cambridge Analytica.

Upplýsingar um 87 milljónir notenda var deilt með fyrirtækinu að því er Facebook hefur greint frá og sagði fyrirtækið um helgina að þessir notendur myndu fá skilaboð þess efnis í gær um að upplýsingum um þá hafi verið deilt með Cambridge Analytica.

Til þess að róa notendur Facebook hefur fyrirtækið nú gefið út tól þar sem fá má úr því skorið á fljótlegan hátt hvort að upplýsingum um tiltekna notendur var deilt með Cambridge Analytica eða ekki.

Facebook hefur mátt þola mikla gagnrýni upp á síðkastið eftir að í ljós kom að Cambridge Analytica, breskt greiningarfyrirtæki sem vann fyrir forsetaframboð Donalds Trump árið 2016, hafi komist yfir upplýsingar um milljónir notenda Facebook með óheimilum hætti.

Tól Facebook má nálgast hér.