Innlent

Dæmdur í 16 ára fangelsi fyrir manndráp á Hagamel

Birgir Olgeirsson skrifar
Khaled hefur setið í gæsluvarðhaldi síðan hann var handtekinn í september. Hér er hann þegar hann mætti í Héraðsdóm Reykjavíkur í dag.
Khaled hefur setið í gæsluvarðhaldi síðan hann var handtekinn í september. Hér er hann þegar hann mætti í Héraðsdóm Reykjavíkur í dag. Vísir/Vilhelm
Khaled Cairo, 39 ára gamall Jemeni, hefur verið dæmdur til 16 ára fangelsisvistar fyrir að hafa banað Sanitu Brauna á heimili hennar á Hagamel í vesturbæ Reykjavíkur þann 21. september síðastliðinn.

Dómur var kveðinn upp í Héraðsdómi Reykjavíkur rétt í þessu. Khaled Cairo var viðstaddur dómsuppkvaðninguna. Hann brosti sínu blíðasta þegar dómurinn var kveðinn upp en síðan er eins og runnið upp fyrir honum ljós og og líkt og þyrmt hafi yfir hann. Sagðist hann á leið sinni út úr salnum hafa sagt sannleikann og fengið 16 ára dóm í staðinn.

Sanita var 44 ára gömul og frá Lettlandi. Hún lét eftir sig þrjú börn og foreldra. 



Khaled var gefið að sök að hafa slegið Sanitu með glerflöskum í höfuð og andlit, slegið hana í höfuðið með tíu kílóa þungu slökkvitæki og þrengt kröftuglega að hálsi hennar.

Dómararnir í málinu.Vísir/Rakel
Heyrðist hrópa á hjálp

Meðleigjandi Sanitu hringdi í Neyðarlínuna þegar árásin átti sér stað. Þar heyrðist meðleigjandinn segja frá því að verið væri að drepa Sanitu og heyrðist hún ítrekað hrópa á hjálp.

Þegar lögregla kom á vettvang stóð Khaled alblóðugur á nærbuxunum einum klæða yfir Sanitu en lögreglan notaði piparúða til að yfirbuga hann.

Ítrekað var komið inn á við réttarhöldin hve einkennilega Khaled hegðaði sér i samskiptum við lögreglu. Virtist hann gera hálfgert grín að öllu saman að sögn lögreglumanns sem sagði frá samskiptum sínum við réttarfarskoðun á Khaled.

„Hann hafði uppi stór orð um samskipti sín við brotaþola (Sanitu). Að hún hefði verið að leika sér að tilfinningum hans og hefði „fucked a nigger” og þar af leiðandi hafði hann þurft að gera það sem hann gerði,” sagði lögreglumaðurinn.

Khaled Cairo var afar ósáttur þegar hann gekk úr dómsalnum. Hann sagðist hafa sagt sannleikann og fengið sextán ára fangelsi í staðinn.Vísir/Vilhlem
Tryllingslegur hlátur merki um varnarviðbragð

Dómkvaddur matsmaður og dómkvaddir yfirmatsmenn töldu allir Khaled Cairo sakhæfan.
 Voru matsmennirnir, sem eru þrír geðlæknar, beðnir um að leggja mat sitt á viðbrögð Khaled við verknaðinum og til að mynda það að hann hefði hlegið tryllingslega þegar árásin á Sanitu Brauna var nefnd við yfirheyrslu.

Einn af geðlæknunum taldi það tengjast frekar varnarviðbrögðum Khaled þegar málið varð honum mjög óþægilegt, en ekki benda til geðrofs. Var hann ekki talinn siðblindur eða andfélagslegur, væri yfir höfuð með eðlilegt geð en haldin einhverskonar persónuleikaröskun sem gerði hann hins vegar ekki ósakhæfan.

Kolbrún Benediktsdóttir varahéraðssaksóknari sagði við munnlegan málflutning málsins  að Khaled Cairo ætti sér engar málsbætur. Hann hefði ekki sýnt neina iðrun heldur þvert á mót kennt Sanitu um hvernig fór.


Tengdar fréttir



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×