Ásgeir Örn með sex mörk í sigri

Ásgeir Örn Hallgrímsson var á meðal markahæstu manna í liði Nimes sem bar sigurorð af Saran í frönsku úrvalsdeildinni í handbolta í kvöld.

Ásgeir skoraði 6 af 30 mörkum Nimes úr sjö skotum. Nimes vann leikinn nokkuð örugglega, 30-23.

Guðmundur Hólmar Helgason komst ekki á blað fyrir Cesson-Rennes sem tapaði á heimavelli gegn Nantes, 27-33.

Aron Pálmarssson skoraði þrjú mörk í fimm skotum í stórsigri Barcelona á Logrono í spænsku úrvalsdeildinni. Leiknum lauk með 37-27 sigri Barcelona.

Tandri Már Konráðsson komst ekki á blað í sigri Skjern á Nordsjælland í dönsku úrvalsdeildinni. Topplið Skjern sigraði með þremur mörkum, 29-32.