Umfjöllun og viðtöl: Haukar 85 - 73 Snæfell: Haukakonur unnu þrettánda leikinn í röð

Skúli Arnarson skrifar
Helena Sverrisdóttir, leikmaður Hauka.
Helena Sverrisdóttir, leikmaður Hauka. vísir/ernir

Það fór fram hörkuleikur í Schenker Höllinni í dag þegar Haukar lögðu Snæfellinga af velli með 85 stigum gegn 73 stigum í 24. umferð Dominos deildar kvenna. Leikurinn var æsispennandi allan tímann en Haukarnir sigldu fram úr í fjórða leikhluta og unnu nokkuð þæginlega sigur. Sigurinn var gífurlega mikilvægur fyrir Hauka í titilbaráttunni. Haukar sitja í efsta sæti deildarinnar, fjórum stigum á undan Valskonum. Valskonur eiga þó leik til góða. Þessi tvo lið mætast í næstu umferð.

Haukarnir byrjuðu talsvert betur og voru með 7 stiga forystu eftir fyrsta leikhluta en þá hrukku Snæfell heldur betur í gang og byrjuðu 2.leikhlutann á því að hitta úr þremur þriggja stiga körfum á fyrstu einni og hálfri mínútunni. Einnig léku þær frábæra vörn og áttu Haukastelpur engin svör. Snæfell unnu 2.leikhlutann 11-23 og voru yfir, 34-39 í hálfleik. Mjög verðskulduð forysta.

Seinni hálfleikur fór rólega af stað og skiptust liðin á að tapa boltanum. Haukar náðu snemma að jafna og skiptust liðin á að hafa forystu það sem eftir lifði af 3.leikhluta. Að honum loknum voru Snæfell með þriggja stiga forskot, 54-57.

Haukarnir fóru í maður á mann vörn seint í þriðja leikhluta og héldu þeirri vörn áfram í fjórða leikhluta með góðum árangri. Þær fóru að vinna boltann í sífellu og fengu þar af leiðandi auðveldar körfur hinumeginn á vellinum. Snæfellingar voru aðeins með sjö á skýrslu í dag og leit út fyrir að það væri komin talsverð þreyta í liðið þegar leið á 4.leikhluta. Haukarnir sigldu sigrinum þæginlega heim á lokamínútunum.

Afhverju unnu Haukar?
Haukar sýndu einfaldlega muninn á gæðunum í leikmannahópum liðanna í lok leiks. Helena steig upp og var frábær í seinni hálfleik og skoraði mjög mikilvæg stig. Einnig var eins og það væri komin talsverð þreyta í Snæfellsliðið eftir að hafa spilað frábæra þrjá leikhluta. Maður á mann vörnin hjá Haukum í lokin virkaði fullkomlega og stálu þær hverjum boltanum á fætur öðrum í fjórða leikhluta.

Hverjar stóðu upp úr?
Fyrir Hauka var Helena Sverrisdóttir frábær í seinni hálfleik eftir frekar slakan fyrri hálfleik, þar sem hún var einungis með 6 stig. Hún endaði leikinn með 21 stig, 17 fráköst og 12 stoðsendingar. Whitney Frazier var góð eins og í síðustu leikjum og skoraði 30 stig í leiknum úr aðeins 20 skotum. Þóra Kristín Jónsdóttir var einnig mjög góð í seinni hálfleik og skoraði 15 stig, tók 5 fráköst og átti 6 stoðsendingar. Í liði Snæfells var Kristen McCarthy mjög góð með 32 stig, 17 fráköst og 5 stoðsendingar.
 
Hvað gekk illa?
Það var rosalega mikið um tapaða bolta hjá báðum liðum í leiknum. Haukar töpuðu boltanum mikið í fyrstu þrem leikhlutunum og Snæfell tóku við af þeim í þeim fjórða leikhluta. Saman voru töpuðu boltarnir í leiknum 39 sem verður að teljast frekar mikið.

Hvað gerist næst?
Haukar mæta eins og áður segir Val í næstu umferð og verður mikið undir í þeim leik. Draumurinn um að komast í úrslitakeppnina er nánast úr sögunni fyrir Snæfell eftir þetta tap, en þær mæta Njarðvík í næsta leik sem hafa ekki enn náð að krækja í sigur í deildinni.


„Tvö stig það eina sem stendur upp úr“
Ingvar Þór, þjálfari Hauka, var ekki ánægður með spilamennsku síns liðs í dag og sagði að það eina sem stæði upp úr í leiknum væru þessi tvö stig sem Haukar fengu. „Mér fannst við vera slakar, sérstaklega í fyrri hálfleik. Það vantaði stemningu og baráttu hjá okkur.“

Haukar áttu í vandræðum með svæðisvörn Snæfells í leiknum sem vann boltann af þeim 18 sinnum í leiknum en Ingvar sagði að svæðisvörnin hefði alls ekki komið sér á óvart.

 „Við vissum að þær myndu spila svæðisvörn, við lentum í svæðisvörn á móti Njarðvík í síðasta leik svo við vorum alveg undirbúin undir þetta og mér fannst það ekki vera svæðisvörnin sem var að koma okkur í vandræði. Mér fannst hausinn á okkur bara ekki vera klár í þetta.“

Ingvar var ánægður með vörnina sem Haukarnir spiluðu í lokin, en þá fóru Haukarnir að pressa á Snæfellingana.

 „Við fórum aðeins að pressa á þær í lokin og kom aðeins meira spirit í okkur.“
„Það vita það allir að Helena er langbesti leikmaðurinn í þessari deild og það er frábært að vera með hana í liðinu. Þóra Kristín var einnig frábær í seinni hálfleik eftir að hafa verið mjög slök í fyrri hálfleik eins og eiginlega flestallir.“ Sagði Ingvar aðspurður hversu mikilvægt það væri að hafa leikmann eins og Helenu í liðinu.

Haukar eiga Val í næstu umferð og Ingvar segir að liðið þurfi að spila mun betur í þeim leik heldur en í þessum.

„Við getum ekki bara spilað 10 mínútur í þeim leik, við verðum að mæta alveg 100% í þann leik.“


„Við töpuðum þessum leik bara á fráköstum og töpuðum boltum.“ Sagði Ingi Þór þjálfari Snæfells. Hann óskaði eftir frákastara í sínu liði.
 
Ingi var þokkalega ánægður með spilamennsku liðsins framan af leik en sagði að það væri erfitt að vinna leik þegar hitt liðið fær marga sénsa í hverri sókn.

 „Þær máttu alveg fá opin skot afþví að hittu ekki ömmu sína í jólaboði, það voru sóknarfráköstin sem að kláraði þetta“

Hann vildi ekki meina að það að spila bara með sjö leikmenn á skýrslu væri einhver afsökun fyrir því að tapa leiknum í dag.

 „Það er engin afsökun, það eru lið sem eru að spila bara með 7-8 menn í róteringu svo það er engin afsökun.“

„Ég sagði Ingvari bara að öskra sjálf“
„Mér fannst við voða andlausar og flatar í fyrri hálfleik og voru bara fúlar með sjálfar okkur í hálfleik en ræddum um það í hálfleik að við þyrftum bara að spila betur í seinni hálfleik og sem betur fer þá gekk það.“ Sagði Helena Sverrisdóttir, besti leikmaður Hauka í dag.

Haukar komu betur út í seinni hálfleikinn eftir ræðu frá Ingvari.

„Ég sagði Ingvari bara að öskra aðeins á okkur, stundum þarf það bara.“

Helena hrósaði Snæfellsliðinu eftir leik.

„Snæfell eru með flott lið þó að þær hafi verið vængbrotnar í dag og við þurftum að hafa soldið fyrir þessu.“

„Við áttum fínan seinni hálfleik sem bjargaði okkur í dag en við vitum alveg að á móti Val þurfum við að vera tilbúnar og spila allar 40 mínúturnar.“ Sagði Helena um leikinn sem Haukar eiga við Val í næstu umferð.

Bein lýsing

Leikirnir




    Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.
    Velkomin á Vísi. Þessi vefur notar vafrakökur. Sjá nánar.