Alfreð fær ekki nýja vinnu, Prokop verður áfram

Þýska handknattleikssambandið ákvað í dag að halda Christian Prokop í starfi en miklar vangaveltur hafa verið í Þýskalandi um framtíð hans, ekki sýst vegna ummæla Dags Sigurðssonar í Seinni bylgjunni á Stöð 2 Sport á dögunum.

Prokop tók við starfi landsliðsþjálfara í fyrra þegar Dagur hætti með þýska landsliðið eftir að hafa gert það að Evrópumeisturum árið 2016.

Liðið þótti ekki ná viðunandi árangri á Evrópumótinu í Króatíu fyrr á árinu þar sem það komst ekki í undanúrslit og sagði Dagur að hann hefði það á tilfinningunni að þýska sambandið ætlaði að ráða Alfreð Gíslason í stað Prokop.

Sjá einnig:Nýjasti spádómur Dags: Alfreð Gísla tekur við þýska landsliðinu

Sambandið fundaði svo í dag þar sem farið var yfir mótið og framtíðin rædd. Eftir fundinn var send út yfirlýsing þar sem greint var frá því að Prokop yrði áfram í starfi.

Andreas Michelmann: „Das Präsidium hat sich hier in Hannover zusammengefunden und entschieden, die Arbeit mit Bundestrainer Christian Prokop fortzuführen.“ #DHBPK#aufgehtsDHB

— DHB_Nationalteams (@DHB_Teams) February 19, 2018

Þýski miðillinn Die Welt segir ákvörðun þýska sambandsins koma á óvart þar sem flestir innan handboltaheimsins hafi talið að Prokop yrði vikið úr starfi. Þar er talið að ástæðan sé sú að of dýrt hefði reynst að segja Prokop upp.