Ísland þarf að fjárfesta í kóðunarkennslu

Indverska ofurbarnið Tanmay Bakshi hélt fyrirlestur um gervigreind í Háskólanum í Reykjavík og á UT-Messunni sem hófst í morgun.

Bakshi segir að Ísland þurfi að fjárfesta í kóðunarkennslu í skólum og í rannsóknum og þróunarvinnu til að geta orðið í fararbroddi í upplýsingatækni. Hann segir einnig að framtíð gervigreindar snúist um að taka allt sem mannfólkið gerir nú þegar og framkvæma það á skilvirkari og betri hátt.

„Gervigreind er komin til að betrumbæta okkar getu og hjálpa okkur að gera það sem við gerum, en bara gera það enn betur,” segir Bakshi sem er aðeins 14 ára.

Tanmay er heiðursráðgjafi og talsmaður IBM á sviði tölvuskýja en hann byrjaði að forrita aðeins fimm ára gamall. Hann er á meðal yngstu forritara á sviði hugrænnar tölvunar og tölvuskýja sem þróa forrit til að auka getu mannsins með notkun djúptauganeta.

Hér fyrir neðan má sjá fyrirlestur Bakshi, sem fór fram fyrir fullum Eldborgarsal í morgun. Á undan flytur Katrín Jakobsdóttir erindi og setur UT-messuna.

Bakshi segir að til Ísland geti verið framarlega í upplýsingatækni þurfi að fjárfesta í því að koma kóðunarkennslu í stundaskrár.

„Ef krakkar eru ekki orðnir skólaðir í kóðun er ómögulegt fyrir Ísland sem þjóð að vera í fararbroddi í upplýsingatækni og auðvitað fjórðu byltingunni ásamt allri þeirri þróun sem fylgir henni. Í öðru lagi þarf Ísland að fjárfesta í rannsóknum og þróunarvinnu sem fylgir fjórðu iðnbyltingunni eins og örtækni, Internet hlutanna og Cloud og það sem mikilvægara er, hugræn tölvun og gervigreind. Án þessara fjárfestinga er ekki möguleika fyrir rannsóknarstofnanir að vinna þá vinnu sem þær þurfa til að ýta áfram þróunina sem þörf er á,” segir hann enn fremur.

UT messan er opin almenningi á morgun, laugardag. Margt skemmtilegt verður í boði þar fyrir fólk á öllum aldri m.a. ofurvélmenni og gervigreindarmarkvörðurinn Robokeeper, sem mun standa í markinu á Origo básnum á morgun. Þar gefst gestum tækifæri að reyna að skora hjá þessum magnaða markmanni sem hefur m.a. keppt á móti Lionel Messi og Neymar með góðum árangri.