Uppveðraður á foreldrafundi annarra barna en hans eigin

Freyr Ólafsson, formaður Frjálsíþróttasambands Íslands og fjögurra barna faðir, sló í gegn á Facebook-síðu sinni í dag þegar hann upplýsti um þátttöku sína á foreldrafundi drengja í 7. flokki drengja hjá Þrótti í gærkvöldi. Fundi sem hann átti ekkert erindi á. Hann segir sig og konu sína Kristjönu reyna að vera virk í félagsstörfum tengdum íþróttum og skóla. Of virk að mati unglinganna á heimilinu.

„Í gærkvöldi má þó segja að ákveðnum hápunkti hafi verið náð. Ég var fulltrúi heimilisins á frábærum foreldrafundi 7. flokks stráka í knattspyrnu hjá Þrótti. Ég kom uppveðraður heim, en þegar við hjónin fórum að telja saman börnin og aldur þeirra kom í ljós að við eigum víst engan dreng í flokknum þennan veturinn,“ segir Freyr í færslunni sem vinir og kunningjar keppast við að hlæja að.

Flestir gera þær athugasemdir að nógu erfitt sé allajafna að fá fólk til að mæta á slíka viðburði. Sjaldgæft sé að fólk bæti við sig foreldrafundum þar sem börn þeirra eigi ekki í hlut.

Freyr hlær að þessu öllu saman í samtali við Vísi. Hann segir misskilninginn felast í því að sonur hans hafi gengið upp í 6. flokk í haust. Freyr hafi hins vegar gleymt að yfirgefa Facebook-grúppu flokksins og því tekið til sín að eiga að mæta á fundinn. Þangað hafi hann mætt og fundurinn, sem fjallaði um starfið í vetur, gengið vel. Veturinn hafi virkað spennandi, sem hann vafalítið verður hjá strákunum í 7. flokki.

Freyr segist sem betur fer ekki hafa boðið fram krafta sína í ábyrgðarstörf enda með frjálsíþróttasambandið á herðunum. Hann þurfi að nýta tíma sinn og orku í að sannfæra Dag B. Eggertsson borgarstjóra og Lilju Alfreðsdóttur menntamálaráðherra að drífa í að byggja þjóðarleikvang fyrir frjálsar íþróttir.

Freyr og kona hans Kristjana eiga fjögur börn en þar af eru þrír drengir sem æfa fótbolta með Þrótti. Þá eru börn þeirra fjögur á fjórum skólastigum. Menntaskólanum við Sund, Laugalækjarskóla, Laugarnesskóla og leikskólanum Hofi.