Mikilvægur sigur hjá lærisveinum Alfreðs

Kiel vann mjög mikilvægan sigur á Veszprém í B-riðli, 22-20, en leikið var í Þýskalandi í kvöld. Með sigrinum eru liðin með jafn mörg stig í þriðja og fjórða sæti riðilsins.

Alfreð Gíslason og lærisveinar hans voru sterkari aðilinn í fyrri hálfleik. Þegar liðin gengu til búningsherbergja voru Þjóðverjar fimm mörkum yfir, 14-9.

Í síðari hálfleik mættu Veszprém sterkari til leiks og veittu Kiel harða mótspyrnu enda með frábært lið. Að endingu stóð þá Kiel uppi sem sigurveagri, 22-20.

Niclas Ekberg og Lukas Nilsson skoruðu sjö mörk hvor fyrir Kiel, en Momir Ilic skoraði fimm fyrir gestina á sínum gamla heimavelli.

Nú eru liðin í þriðja og fjórða sætinu með þrettán stig hvor, en Flensborg er í öðru sætinu með 14 stig og PSG á toppnum með 18 stig.