Þorbjörg og Karl verða aðstoðarmenn Þorsteins

Þorsteinn Víglundsson, félags- og jafnréttismálaráðherra, hefur ráðið sér tvo aðstoðarmenn til starfa í velferðarráðuneytinu, þau Karl Pétur Jónsson og Þorbjörgu Sigríði Gunnlaugsdóttur.

Þetta kemur fram í tilkynningu frá ráðuneytinu.

Karl Pétur er fæddur 30. ágúst 1969. Hann hefur frá árinu 2009 starfað sem ráðgjafi í almannatengslum ásamt því að framleiða leikverk og sjónvarpsþætti. Karl Pétur er varabæjarfulltrúi á Seltjarnarnesi þar sem hann situr í skólanefnd og jafnréttisnefnd. Hann er kvæntur Guðrúnu Tinnu Ólafsdóttur og eiga þau fimm börn saman.

Þorbjörg Sigríður er fædd 23. maí 1978. Hún hefur verið deildarforseti lagadeildar Háskólans á Bifröst frá 2015 og var aðstoðarsaksóknari hjá ríkissaksóknara áður en hún hóf störf hjá Bifröst. Þorbjörg starfaði sem aðstoðarsaksóknari og deildarstjóri ofbeldisbrota hjá lögreglustjóranum á höfuðborgarsvæðinu og var aðstoðarmaður dómara í Héraðsdómi Reykjavíkur, svo fátt eitt sé nefnt, en nánar má lesa um Þorbjörgu og Karl á vef velferðarráðuneytisins.