Flóttamannabúðir við Dunkirk brenna til kaldra kola

Að minnsta kosti 10 eru særðir eftir að eldur kviknaði í Grand-Synthe flóttamannabúðunum í útjaðri frönsku borgarinnar Dunkirk í kvöld.

Um 1500 manns höfðu aðsetur í tjaldbúðunum.

„Það er ekkert eftir nema öskuhaugur,“ sagði Michel Lalande, héraðsstjóri franska Nord-umdæmisins. „Það verður ómögulegt að koma skýlunum fyrir þar sem þau voru áður.“

Lalande sagði að eldurinn hefði brotist út eftir slagsmál á milli afganskra og kúrdískra hópa eftir hádegi á mánudag. Yfirvöld á svæðinu höfðu í hyggju að leysa búðirnar upp eftir að átök höfðu ítrekað brotist þar út. Lögreglan hafði síðast afskipti af búðunum í síðasta mánuði en þá særðust fimm menn eftir slagsmál sín á milli.

Íbúafjöldi í Grand-Synthe tjaldbúðunum hafði aukist mjög á síðustu misserum eftir að sambærilegar búðir við Calais í Frakklandi, Frumskógurinn svokallaði, voru jafnaðar við jörðu í október í fyrra.