Syngur yfir gullsmíðinni

Svana Berglind lauk sveinsprófi í gull- og silfursmíði frá Tækniskólanum vorið 2016 og sest aftur á skólabekk næsta haust í meistaraskólanum. Hún er einn af stofnendum Raus Reykjavík sem tekur þátt í HönnunarMars og sýnir þar sína fyrstu skartgripalínu sem gerð er í samstarfi við Bláa lónið.

Hverjar standa að Raus með þér? Með mér eru Auður Hinriksdóttir skartgripahönnuður, Harpa Kristjánsdóttir, gull- og silfursmíðameistari, og Rut Ragnarsdóttir, skartgripahönnuður og myndlistarkona.

Hvaðan kemur nafnið Raus Reykjavík? Raus varð til úr upphafsstöfum þriggja okkar (Rut, Auður, Svana) en við hófum samstarfið áður en Harpa kom inn í myndina. Það kom til tals að hún fengi sinn staf líka og nafnið yrði Hraus en þar sem er oft galsi í hópnum og við höfðum hlegið mikið að hugmyndinni um „rausandi“ kerlingar sitjandi við smíðaborð þá hélt þetta sér. Í lógói fyrirtækisins er au-ið í Raus einnig breiðara en hinir stafirnir en það kemur til af því að tákn gulls í lotukerfinu er Au.

Hvers vegna ákvaðstu að læra gullsmíði? Þessi mikli áhugi minn á skartgripum kviknaði sennilega á barnsaldri þegar ég fékk að leika mér með skartgripakistil sem mamma átti. Svo álpaðist ég á námskeið hjá Leifi Jónssyni gullsmíðameistara og þá rann loksins upp fyrir mér hvað ég ætlaði að verða þegar ég yrði stór.

Hvað varstu að gera þegar þú hófst námið? Ég var skrifstofustjóri hjá bílaumboðinu Heklu og söngkona í hjáverkum þegar ég hóf námið. Það er gríðarlega erfitt að komast inn í gullsmíðadeildina svo að á meðan ég beið eftir því að komast inn fór ég í hönnunarnám í eitt ár til að hafa betri bakgrunn. Átta nemar komast inn í námið á hverju hausti og um áramót heltast nokkrir úr lestinni. Námið er mjög strangt og svo er gríðarlega erfitt að komast á samning svo að við vorum einungis tvö úr mínum bekk sem útskrifuðumst á réttum tíma.

Syngur þú við gullsmíðina? Já, ég kem víst með þeim ósköpum að ef ég er ekki syngjandi þá er ég flautandi. Ég er bara svo stálheppin að stelpurnar í Raus Reykjavík segja að það sé bara heimilislegt en dætur mínar deila víst ekki þeirri skoðun.

Hvar er hægt að kaupa skart frá ykkur? Um helgina verður heimasíðan okkar, www.raus.is, opnuð og þar munu á næstunni koma inn myndir af því sem við erum að hanna og smíða og þar er einnig hægt að kaupa skart frá okkur eða gera sérpantanir. Sýningin okkar, vegna HönnunarMars verður haldin í verslun Bláa lónsins, Laugavegi 15, frá 23.-26. mars.