Grunaður um nauðgun á skemmtistað í Reykjavík

Norskur karlmaður um fertugt er grunaður um að hafa nauðgað sextán ára stúlku á salerni á skemmtistað í Reykjavík aðfaranótt 28. október síðastliðinn. Hann hefur verið úrskurðaður í farbann til 22. nóvember þar sem hann sé undir rökstuddum grun að hafa nauðgað stúlkunni. Sá norski neitar sök.

Í kröfu lögreglustjórans á höfuðborgarsvæðinu kemur fram að stúlkan hafi hitt manninn á skemmtistað umrætt kvöld. Þau hafi kysst, vel farið á með þeim og þau farið inn á salerni staðarins. Þar hafi hann rifið niður um hana buxurnar og við það hafi hún frosið. Ekki þorað að gera neitt.

Þóttist þurfa að pissa

Í framhaldinu hafi ferðamaðurinn haft við hana samræði þrátt fyrir mótmæli hennar. Sagðist hún að endingu þurfa að nota salernið en það hafi verið afsökun til að komast undan. Hann hafi þá hætt og hún farið út af salerninu.

Stúlkan fór inn á næsta salerni þar sem hún grét og sendi systur sinni mynd af sér grátandi. Sagðist hún halda að sér hefði verið nauðgað. Systir hennar bað hana um að koma til sín en hún var við vinnu í miðbænum.

Á leið út af skemmtistaðnum hitti stúlkan þrjár vinkonur sínar og sagði þeim að hún héldi að henni hefði verið nauðgað af manninum sem hún hafi verið að kyssa áður. Sagði hún þeim að hann hefði rifið buxurnar hennar og nærbuxur og hafi þær séð að rennilás buxnanna hefði verið skemmdur. Hún hafi síðan farið af staðnum og á leiðinni að hitta systur sína hafi hún hringt í vin sinn og sagt honum frá því sem gerst hefði.

Ætlaði af landi brott sem fyrst

Vinkonur hennar sem eftir hafi verið á staðnum hafi beðið starfsmann staðarins að hringja á lögreglu og hafi lögreglan handtekið kærða á vettvangi. Hafi lögreglan síðan leitað að brotaþola og ekið henni á neyðarmóttöku. 

Í kröfu lögreglustjórans um farbann segir að Norðmaðurinn sé undir rökstuddum grun um að hafa nauðgað stúlkunni. Hann sé ferðamaður og fram hafi komið að hann ætli af landi brott sem fyrst. Því sé nauðsynlegt að fá farbann yfir honum þar til mál hans er til lykta leitt.

Brot mannsins varðar allt að sextán ára fangelsi samkvæmt lögunum en ekki eru þó fordæmi fyrir svo þungum brotum fyrir brot af þessu tagi.

Lögmaður mannsins áfrýjaði niðurstöðunni úr Héraðsdómi Reykjavíkur til Hæstaréttar sem staðfesti úrskurðinn. Dóm Hæstaréttar má lesa hér.